Del Monte, Alberto. Peire d'Alvernha, Liriche. Torino: Loescher-Chiantore, 1955.

Code: 323,024 Auteur: Peire d'Alvernha Genre: Vers Numero: XI

Sobre·l vieill trobar e·l novel

I	1	Sobre·l vieill trobar e·l novel
		vueill mostrar mon sen als sabens,
		qu’entendon be   aquels c’a venir so
		c’anc tro per me   no fo faitz vers entiers;
	5	e qui non cre   qu’ieu sia verdadiers
		auja dese   con estau a razo.
II		Qu’ieu tenh l’us e·l pan e·l coutel
		de que·m platz apanar las gens;
		que d’est mestier   an levat en pairo,
	10	ses acordier   que no·s rompa·l semdiers,
		qu’ieu die que nier   mi mostr’els faitz non niers,
		qu’a fol parlier   ten hom lui e·l sermo.
III		C’a un tenen ses mot borrel
		deu de dir esser avinens;
	15	quar qui trassaill   de M-ari en Mi-ro,
		entre·l mieg faill   si no·s pren als ladriers;
		com del trebaill   quecs motz fatz messatgiers
		qu’en devinaill   met l’auzir de maizo.
IV		E qui qu’en frima ni·n fragel,
	20	pos qu’es mos trobars tan valens
		.....................................................
		q’ieu soi raitz   e dic qu’ieu soi premiers
		de digz complitz,   vensen mos fatz guerriers,
		que·m levon critz   que ieu no m’en tenh pro.
V	25	Donx com qu’ill sion d’un tropel
		menton tot gent er per las dens,
		qu’ie·m sen sertas   del mieils qu’es e que fo,
		enseguras   de mon chant e sobriers
		ves los bauzas,   e sai que dic, qu’estiers
	30	no vengra·l gras   don a trop en sazo.
VI		Quar er m’abelis e m’es bel
		qu’el mieu ioi s’enant la iovens;
		e s’ieu ren dic   que lur an enviro,
		aisi me’n gic,   c’uns gaugz mi creis dobliers
	35	d’un dous espic   qu’es ioios consiriers,
		don m’an amic   hueimais li mai e·ill bo.
VII		D’aisi·m sent ric   per bona sospeiso
		qu’en ioi m’afic   e m’estau volentiers,
		et ab ioi pic   e gaug mos deziriers
	40	et ab ioi pic   e gaug vueill: Dieus lo·m do.