Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,016 Auteur: Bertolome Zorzi Genre: Planh Numero: XVIII

Sil monz fondes a maravilha gran

I	1	Sil monz fondes a maravilha gran,
		Non l’auria ges a descovinenza,
		S’escurzis tot sivals so que resplan,
		Pois Quonratz reis, en cui renhet valhenza
	5	E valc jovenz     e rics pretz e totz bes,
		E d’Austorica l’auz ducs Federics,
		Qui d’onrat pretz e de valor fon rics,
		Tan malamenz     son mort.     Hai quals dans n’es !
		Mas car pres al segle tan de dampnage
	10	Tanh qu’om l’azir,     e car ergolhs a pres
		Forz’e consir     d’aunir pretz e parage.
II		Mas ieu me vauc trop fort meravilhan,
		Com hai esfortz qu’en digalh meschaenza
		Nil cozen dol nil sobremortal dan,
	15	Quar dregz fora, segon ma conoissenza,
		Quel membramenz     ses retrar m’aucies
		E tot home qu’es de valor abrics,
		Quar anc non fon hom joves ni antics
		Quel menh valenz     truep fort     nolh sobrandes ;
	20	Qu’il e lur faig eron tan d’agradatge
		Que per l’auzir,     ben qu’om nols conogues,
		L’irat sentir     fazion alegratge.
III		Quel reis, en cui non eron anc vint an,
		Amava deu, dreg, mesur’ e sienza,
	25	De que l’anet pauc Salemos enan,
		E Lamorat valc per armas ses tenza ;
		E larjamenz     a poder det e mes,
		Tan quel plus larcs senblav’ ab lui mendics,
		E fon amics als pros et enemics
	30	Als desplazenz     ses tort     qu’anc lur fezes.
		Ni non ac melh Anzalos l’eritage
		D’aut abellir,     tan fon belz e cortes,
		E ses falhir     fon del plus aut linhatge.
IV		Et el pro duc eron tant aib plazen
	35	Qu’el ac de mout la rejal chaptenensa,
		Qu’adreg foron sei dig e sei semblan,
		E l’afars ac daus totas partz plazensa,
		Si qu’anc formenz     non falhic ni mespres.
		Don cuig qu’a deu fon lurs mortz grans fastics,
	40	Mas car sofric qu’avengues tals destrics,
		Tot fermamenz     m’acort     quelh remembres
		Qu’el mon per els non avi’ aut estatge,
		E que grazir     deuri’om per un tres
		L’entier jauzir     per lur bel companhatge.
V	45	Hai ! com vivon Tyes et Aleman,
		S’inz el cor an d’aquest dan sovinenza,
		Quar tot lur mielh en estz dos perdut an,
		E gazanhat an gran desconoissenza ;
		Que si plazenz     nos venjon demanes,
	50	Aunit viuran, tan fon Karles enics,
		Qu’el s’agradet que visques don Henrics
		E mortz cozenz,     a port     d’ant’ alberges.
		Estz bars, quar sap Espanhols d’aut coratge
		E per far dir     qu’el no si dupta ges
	55	En far aunir     tant honrat senhoratge.
VI		Hei, franca genz,     lur mort     pensatz ades
		E ques dira, seus sofretz tal outraje ;
		E satalbir     N’Anfos, qu’onratz reis es,
		Si laiss’ aunir     son frair’ en tal estatge.
VII	60	Als avinenz     recort     quel planhs faigz es
		Ab gai sonet, coindet e d’agradage,
		Qu’estiers m’albir     qu’om chantar nol pogues
		Ni neis auzir,     tan mou de gran dampnage.