Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,089 Auteur: Guiraut Riquier Genre: Vers Numero: XI

Yverns no·m te de chantar embargat

		LO XI VERS D'EN GR. RIQUIER, FACH EN L'AN MCCLXXVII
I		Yverns no·m te de chantar embargat,
		ni per estiu non suy pus voluntos,
		mas totas vetz, quan m'en somo razos,
		truep mon engienh de chantar atemprat;
	5	ez es be semblans
		que no m'es afans
		chans,
		qu'aitals sabers m'es donatz,
		qu'ieu chan quan vuelh de que·m platz.
II	10	Ses plazer chant e ses esper de grat,
		pero mos chans non er tristz ni joyos,
		qu'ieu no·m lauzi ni no suy rancuros
		del Belh Deport qu'ay non amatz amat;
		don sembli efans,
	15	quar ai sufert tans
		ans,
		que sol no·m suy assaiatz
		a virar de l'autre latz.
III		Del segle veg que m'a lag galiat,
	20	quar sos segres m'es avuz saboros,
		crezen que sens mi fos ab saber bos;
		mas eras n'ai mon cor desesperat,
		qu'ab vils faitz truans
		n'es hom benanans,
	25	ans
		que vergonhos ni senatz;
		e vuelh n'esser enjanatz.
IV		S'ieu ai servit, no m'es gazardonat
		per mos senhors ni pel segle ginhos
	30	ni per dona, de que no suy clamos,
		quar s'amors m'a en tal saber montat,
		que m'es pro bastans;
		mas no m'es enans
		grans,
	35	ez el temps que n'es passatz,
		fora·m grazitz ez honratz.
V		E si no m'es esta vetz restaurat
		per lo valen rey castellan n'Anfos,
		si que semble ben sieus le gazardos,
	40	de mon chantar e d'elh penrai comjat;
		pero non clamans,
		quar trop malestans
		dans
		seria, tant es lauzatz
	45	avutz per mi de vertatz.
VI		No suy acordans,
		bos reys, qu'ieu mos chans
		lans
		vas lunh autre rey; pagatz
	50	ni fuy, quinz ans a passatz.
VII		Doncx pus que·us me suy donatz,
		parer dey vostres, si·us plaz.