Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,079 Auteur: Guiraut Riquier Genre: Vers Numero: XII

S'ieu ja trobat non agues

		LO XIII VERS D'EN GR. RIQUIER, L'AN MCCLXXX, EN DECEMBRE
I		S'ieu ja trobat non agues,
		tantas de bonas razos
		auch en cort del rey n'Anfos,
		qu'er saubra trobar, so·m pes.
	5	Donc, pus sabers me n'es guitz,
		si tot chans non es grazitz
		ni socors non ai d'amor,
		al bon rey tanh tan d'onor
		que dey, si puesc, bon vers far.
II	10	El bon rey a tans de bes,
		que grazitz es sos ressos
		e·l laus tan grans e tan bos,
		que·l mielhs del mon l'a perpres;
		quar tant l'es pretz abelhitz,
	15	que saber e faitz e ditz
		e cor e sen e ricor
		a tot donat a valor,
		e si vers es, assatz par.
III		Qu'er aug qu'elh e·l rey frances,
	20	don cuiav'esser tensos,
		veyrem acordar amdos;
		que'l princeps, que senhers es
		dels Proensals, n'es auzitz,
		e crey que n'er obezitz;
	25	quar dreytz e patz l'an sabor,
		e par qu'ab Nostre Senhor,
		o pot tot leu endressar.
IV		Plazer deu al rey engles
		lurs acortz, quar sospeyssos
	30	non l'an, e plagra·m que· y fos
		elh e·l reys aragones,
		qu'ab valor s'es enantitz;
		q'usquecx deu esser aizitz
		de voler l'acort de lhor,
	35	e·l reys n'Anfos per vigor
		poira·n Granada levar.
V		Be·m play quar l'onratz marques
		de Monferrat cabalos,
		al rey fa prezent joyos;
	40	mas ans, de luy tal lo pres,
		que·s n'es d'onor enantitz
		e de poder afortitz;
		don devon aver temor
		sey enemic qu'ab dolor
	45	los fassa breument estar.
VI		Tug aquist fag me son guitz
		d'est vers far, tant vey aizitz
		cristias del salvador
		servir, sol van per s'amor
	50	la sancta terra cobrar.
VII		Bos reys n'Anfos, mout auzitz
		es vostres laus, mas cumplitz
		no fon per lunh lauzador,
		ans, prendon tug mais d'onor
	55	que vos el vostre lauzar.