Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Code: 323,001 Auteur: Peire d'Alvernha Genre: Vers Numero: V

Abans que·l blanc pueg sion uert

I	1	Abans que·l blanc pueg sion uert,
		ni ueiam flor en la sima,
		quan l’auzel son de chantar nec,
		q’us contra·l freg non s’esperta,
	5	adoncs uuelh nouelhs motz lassar
		d’un uers, qu’entendan li melhor,
		que·l bes entre·ls bos creis e par.
II		Per so·m plai qu’en lo temps no uert
		mostre·s uers de razon prima
	10	als ualens, cui sabers cossec,
		quar esta gens mal aperta
		non sabon ren, que·is uol leuar,
		que sens per nulh doctrinador
		ses bon cor no pot melhurar.
III	15	Dins es poirida e sembla uert
		un’auols gens, que blastima
		tot so qu’anc dreitura amec ;
		e pus negus no s’acerta ;
		dieus, quant pot hom en els blasmar,
	20	qu’anc no i agron l’artelh menor
		manht home, a cui augh pretz dar.
IV		Nuls hom del mon non a pretz uert,
		quan uol daurar e pueys lima,
		per qu’es fols sel que·s n’aüzec,
	25	pos ue que bes no i reuerta ;
		qu’a la cocha pot hom proar
		amic de boca ses amor,
		mas don no ues, non esperar.
V		Qui anc ui fresc iouen ni uert,
	30	ar es mortz per gent cayma,
		que cuja far tot lo mon sec,
		qu’ieu non uey fol ni mamberta,
		q’us non fassa soften son par ;
		per so frutz torna en peior :
	35	dous semblan ab sabor d’amar.
VI		Ben sap far paisser herba uert
		femna, que·l marit encrima
		per son auol fag tener nec ;
		d’aqui nays la gens dezerta
	40	de pretz, q’us no·n auza parlar
		mas : de mal frug mala sabor ;
		e·lh filh non uolon sordeiar.
VII		Aissi naisson sec e non uert,
		q’us d’enjan non repayma ;
	45	ni anc, pos dieus Adam formec,
		non tenc tant sa port’ uberta
		bauzia, qu’en fai manhs intrar ;
		que lop son tornat li pastor,
		qui degron las fedas gardar.
VIII	50	Cobeeza a mort pretz uert,
		qu’ensenha·ls baros d’escrima ;
		e cobezetatz s’abrazec,
		un’arsors, que es uberta,
		don uezem manht ric abrazar ;
	55	pretz cuion traire d’aul labor,
		mas anc ses dieu no ui pretz car.