Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,062 Auteur: Guiraut Riquier Genre: Vers Numero: XIII

Per proar si pro privatz

		LO XIIII VERS D'EN GR. RIQUIER, L'AN MCCLXXXIII, EN NOVEMBRE
I		Per proar si pro privatz
		m'es mos sabers mentaugutz,
		vuelh valen vers far viatz
		obratz d'obra, don ja brutz
	5	no crey que·n cresca cabals,
		don dans m'a dat desconort,
		tant vey trobar trist a tort.
II		Trop tart er trobars trobatz,
		que·l mons de mundar mogutz,
	10	gaire gays guide, don gratz
		lans son don lauzan a lutz;
		quar faitz vol qu'om fassa fals
		e·ls bos e·ls bes bayssa fort,
		tant que·l mielhs e·l mays son mort.
III	15	Mal m'es quar mals es montatz
		e bes bayssan abatutz,
		volven ver en vanitatz,
		escassan bes quays cazutz;
		qu'enguans d'enguanar engals
	20	a sols sotzmes a sa sort
		lo mon lag, luenh de bon port.
IV		Larcs es le laitz, eslayssatz,
		non braus, abrivatz, batutz
		camis croys, on corr cochatz
	25	totz lo mons tortz, entendutz
		en far vils faitz yfernals,
		don l'aduch en desacort
		sos senhers ses san conort.
V		Si sens de saber sazatz
	30	agues guaire guitz avutz,
		Dieus, a dar dos adonatz,
		bos, benestans, bels saubutz,
		nos pascr'ab patz, passatz sals;
		mas notz non lo nos, que·ns mort
	35	e·ns ro ros, ras del bon ort.
VI		Reys ricx regnans los reyals,
		faitz nos far fach de deport
		final, qu'a fin fis nos port.
VII		Filhs e fraires an fach tort
	40	per pro: ses pro planc mot fort.
VIII		Per pretz planc mon Belh Deport.