Beltrami, Pietro G.; Santagata, Marco. "Razo e dreyt ay si·m chant e·m demori". Un episodio della cultura provenzale del Petrarca. "Rivista di Letteratura Italiana", 5, 1 (1987), pp. 9-89.

Postilla di Pietro G. Beltrami (2014).

Code: 233,004 Auteur: Guillem de Saint Gregori Genre: Canso Numero: -

Razo e dreyt ay si·m chant e·m demori

I	1	Razo e dreyt ay si·m chant e·m demori:
		e com?
		Dieu, per l’amor cui per gensor ampari
		m’es bel
	5	qu’ieu chan de lieys. E no vol m’en parcisca?
		No faray yeu, qu’ab sol son bel respondre
		m’a si conquest
		que ja mais tan quan viva
		vas lieys no farai pec.
II	10	S’esta·m camja, per qu’ieu blasm’ez acori,
		d’aur plom,
		piegz trac, so sai, qu’aysselh del sagitari
		cayrel:
		selh que·l m’a mes greu cug de mi partisca;
	15	del cor on es no·l pot hom for respondre
		que·l ferr no·y rest,
		si la nominativa
		no·l m’en trai cuy en prec.
III		Plus a·l cors blanc que nulhs escacx d’evori;
	20	son nom
		no[·l] aus[i] dir, tan la tem, quan la guari;
		angel
		sembla[·m] del cel quant ieu cug que·m jauzisca,
		quar sobronratz hi fora·l reys de Londre
	25	e·l coms d’Uzest,
		tan es sobragradiva,
		o selh cuy son li Grec.
IV		Dous es lo rams ab que·m bat mas no·m tori,
		do·l om
	30	[do·l so c’]ent[a]ill, c’ai trayt de mori armari
		novel,
		que no·m par sens, pus hom los sieus delisca;
		per me·us o dic, cuy faitz blahir e fondre:
		no vuelh ja·m prest
	35	hom viula ni estiva
		tro sia de sai dec.
V		Dous m’es e bo s’ieu per dezir en mori;
		ges som
		non es l’amors qu’ieu port, per Saynt Alari:
	40	s’irnel
		no·m torna tost, non ay luec que·m sofrisca,
		que no·lh cal ost logar per me cofondre,
		quar a l’afrest
		si·m te fuecx qu’encaliva
	45	pels sermos de mal bec.
VI		Si·m breu non em, fe que deg Saynt Gregori,
		on fom,
		en vestir[a]i floc bru e  ’scapolari,
		cotel
	50	portarai tronc per layssar mala gisca,
		e farai mi ampia corona tondre
		aut sus el test,
		si·l mal no·m recaliva
		l’amor que no consec.
VII	55	Qui que sai rest,
		en Sanguiniers s’abriva
		lai on Sabra son pec.