Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,055 Auteur: Guiraut Riquier Genre: Vers Numero: XIV

Mentaugutz 

		LO XV VERS D'EN GR. RIQUIER, L'AN MCCLXXXIII, EN DECEMBRE.
I		Mentaugutz
		auch que Dieus es
		e crezutz
		que de totz bes
	5	es la lutz,
		e que·l mon fes,
		e que nutz
		per nos mort pres,
		e del vas
	10	ressors de mort,
		per qu'estort
		son e seran peneden
		tuch li veray peneden.
II		Mas tan len
	15	es bes volgutz,
		e corren
		mals es saubutz,
		qu'en parven
		non es temsutz
	20	Dieus, que ren
		meritz degutz.
		So es mes
		denant detras,
		per qu'em ras
	25	de dreg cami e de port
		e perillam ab deport.
III		Qu'om fa tort
		dreg conoyssen,
		per que port
	30	autruy soven
		a vil sort,
		lo sieu perden;
		e·l pus fort
		son pus arden,
	35	per qu'es brutz
		qu'amors ni fes
		ni merces
		no son, q'usquecx a mal pas,
		per que venem a mal pas.
IV	40	Doncx tu, las,
		senes acort,
		que·t faras?
		Aias recort
		que trop as
	45	estat el ort
		ez auras
		so que·t remort
		fach ab sen.
		No sias mutz
	50	quon avutz
		yest de ben; cofes, repres,
		fai que no sias repres.
V		Dieus cortes
		que vols e fas
	55	drech, qu'iest ples
		de gauch, a bras
		pren nostres
		faitz non d'a pas;
		del sotzmes
	60	vil loc trop bas
		ses conort,
		totz bes fazen,
		nos defen
		Senher, e lai nos perdutz,
	65	on non es lunhs bes perdutz.
VI		Belh Deport
		ayc mout valen
		e plazen,
		e no·l puesc mandar salutz;
	70	mas Dieus li sia salutz.
VII		Per saber suy esperdutz,
		quar vey que tant es perdutz.