Vatteroni, Sergio. Le poesie del trovatore Johan Esteve. Pisa: Pacini, 1986.

Code: 266,002 Auteur: Joan Esteve Genre: Canso Numero: I

Aissi cum selh qu'es vengutz en riqueza

		AISSI COMENSA D’EN JOHAN ESTEVE DE BEZERS QUE HOM APPELLAVA OLIER DE BEZERS.
I	1	Aissi cum selh qu’es vengutz en riqueza
		per son esfors, ses tot avol guazanh,
		e la garda, e·n fa so que s’en tanh,
		quar trebalhs es ans qu’om l’aya conqueza,
	5	d’aital semblan suy yeu ricx ses fallensa
		per mon Belh Ray que·m fai viure joyos;
		e·l joy qu’ieu n’ay m’es pus cars e pus dos
		quar trebalhan conquis sa bevolensa.
II		Senes trebalh no mante hom proeza,
	10	qu’al malaute es bo, si tot s’en planh,
		qu’ayssi·n val mais co argens sobr’estanh,
		qu’ab eys lo mal se destruy la maleza;
		e quar trebalh me det la conoyssensa
		de la bella qu’es cuend’e gaya e pros,
	15	pus corals m’es, e·l joy mais saboros,
		e mais me platz quan creys sa gran valensa.
III		Creyssen s’onor me te en tal gayeza
		la franca res, quez em pur gaug me banh,
		e·m estai miels qu’al gras peys en l’estanh
	20	ni a senhor que pot donar nobleza.
		Merces a lieys, quar m’amor li agensa
		e·m te per sieu ez em un ambedos;
		e quar li plai mos chans e mas razos,
		ye·n gar s’onor cum bos homs sa crezensa.
IV	25	Quan gar s’onor, m’onora la corteza
		aissi cum fai hom bos son bon companh,
		qu’a sos grans ops non li fath ni·l sofranh,
		ans li dobla l’onors qu’a per elh preza;
		aissi o fai en faitz ez en parvensa
	30	a mi·l belh cors plazentiers amoros,
		que so qu’ieu vuelh val, quar anc enveyos
		no fuy de re qu’a lieys fos dechazensa.
V		Aissi suy fis cum fis aurs a fineza
		sobre·ls autres metalhs, que res no franh
	35	mos fis volers, que pus fis li remanh
		que·l jorn que·m pres per sieu e·m det franqueza
		sobre·ls amans qu’amon d’autr’entendensa,
		per que·s dechai fis pretz mantas sazos:
		aitals plazers no m’es plazens ni bos,
	40	quar a la fi torna en desplazensa.
VI		Chanso, vai dir, quar a pretz e valensa,
		al bon Guillem de Lodeva, qu’als pros
		val sa valors, quar sobre·ls cabalos
		sap far ricx faigz, e·l Belh Ray beutatz gensa.