Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,052 Auteur: Guiraut Riquier Genre: Vers Numero: XVI

Lo mons par enchantatz

		LO XVII VERS D'EN GR. RIQUIER, FACH EN L'AN MCCLXXXIII, EL MES DE MARTZ.
I		Lo mons par enchantatz,
		quar voutz ez enchantatz
		es, e pres de chazer,
		que tant vey dechazer
	5	los faitz adordenatz
		e·ls desazordenatz
		enantir ses dever,
		que tortz es amparatz
		e dreitz desamparatz,
	10	qu'om no· y cura dever.
II		Per que n'a desplazer
		Dieus, que volc per plazer
		cristias enantir,
		qu'er vol desenantir;
	15	e par quar per aver,
		don devem dol aver,
		nos propcham de perir,
		tant q'us non a poder
		que razos l'apoder
	20	quan degram resperir.
III		Qu'om degra faitz chauzir
		ses son par deschauzir,
		on dreitz ren no perdes,
		e d'als que s'esperdes
	25	don tortz pogues issir;
		mas dels bes desissir
		non es hom leu cofes
		ni las, quant que s'azir,
		ni temors de sazir
	30	no·l fa leu ver cofes.
IV		Qui dels mals se gardes
		e·ls bes ben esgardes
		grans, que Dieus nos a faitz,
		don nos troba desfaitz,
	35	clergues, nobles de pes
		de ginols e de pes,
		se·n fora quecx retraitz,
		per que quant nos clames,
		Dieus de nos no·s clames
	40	ab terribles retraitz.
V		E quascus fora saitz
		de Dieu, per bos assaitz,
		a luy deutes pagatz
		don elh fora pagatz;
	45	e quar le bes es traitz
		de nos, Dieus s'es estraitz
		d'amar, no·s prenden patz,
		qu'avem sos comans fraitz,
		e quar nos troba fraitz
	50	ans, relinquitz ses patz.
VI		D'emperis es empaitz,
		de regnes, de dugatz
		Dieus, el mun, per forfaitz,
		mas nos a tal forfaitz,
	55	qu'a vos sals nos dugatz.
VII		Lo coms s'es esforsatz
		d'Astarac ab mals traitz
		de pretz, don l'es atraitz
		laus de grat non forsatz.
VIII	60	Coms de Rodes, bos plaiz
		es per vos melhuiratz.