Soltau, Otto. Die Werke des Trobadors Blacatz. "Zeitschrift für romanische Philologie", 23 (1899), pp. 201-248.

Code: 097,004=388,003 Auteur: Blacatz , Raimbaut Genre: Tenso (Partimen) Numero: I

En Raembaut, ses saben

		Raembautz e’n Blacatz.
I	1	En Raembaut, ses saben
		Vos fara pros dompn’ amor
		Complid’, o per vostr’ honor
		Fara cuidar a la gen,
	5	Ses plus, qu’il es vostra druda ;
		E si no·n sabetz chausir
		Lo mieils segon c’auzetz dir,
		Vostra razos er vencuda.
II		Blacatz, d’aqest partimen
	10	Sai leu triar lo meillor :
		A lei de fin amador
		Mais vueill aver gauzimen
		Tot soavet e ses bruda
		De ma dompna, cui desir,
	15	Que fol creire ses gauzir ;
		Que long’amors es refuda.
III		Raembaut, li conoissen
		Vos o tenran a follor
		Et a sen li sordeior,
	20	Car per gauzir solamen
		Laissatz honor mantenguda ;
		D’aitan no·us podetz esdir
		Que pretz no·is fass’a grazir
		Sobr’ autres faitz a saubuda.
IV	25	Blacatz, tant m’es avinen
		Qand ab midonz, cui ador,
		Puosc iazer sotz cobertor,
		Ren als no m’es tant plazen
		Cum qand la puosc tener nuda.
	30	Doncs cum par c’ab fals mentir
		Poscatz ma razon delir ?
		Mil tans val sabers que cuda.
V		En Raembaut, qui soven
		Derocha son ionzedor,
	35	Qe·il val si no n’a lauzor
		Ni no·n pot aver guiren ?
		Non pretz honor esconduda
		Ni carboncle ses luzir
		Ni colp, qui no·l pot auzir,
	40	Ni huoil sec ni lenga nuda.
VI		Blacatz, be·us dic veramen
		Q’ieu am trop mais fruich que flor
		E mais ric don de seignor
		Que si·m pagava de·l ven.
	45	Ja ab promessa perduda
		Lonc temps no·m pot retenir
		Cill per cui plaing e sospir
		S’ab gauch entier no m’aiuda.