Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Notice Bibliographique

* Présentation
* Bibliographie
* Témoignage
* Appareil critique
* Notes
* Traductions
* Images

Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,012 Auteur: Guiraut Riquier Genre: Vers Numero: XVII

Ancmais per aital razo

    LO XVIII VERS QUE FES GRZ. RIQUIER, V JORNS A L'INTRADA D'OCTOBRE, L'AN MCCLXXXIIII, SO FON LO DIJOUS APRES SANT MIQUEL.
     
I   Ancmais per aital razo
    no fuy de chant embargatz,
    qu'er suy de joy tant sobratz,
    que mos sabers no·m ten pro
  5 per chantar del gran plazer
    qu'ieu ay, segon mon dever,
    quar sai mon senhor estort
    n'Aymeric, de peitz de mort
    ad honor, don quays perduda
  10 es Narbona revenguda.
     
II   E Dieus, a cuy dreitz sap bo,
    sia·n grazitz e lauzatz,
    e don nos acort e patz
    ad honor tota sazo
  15 de mo senhor, ses voler
    del sieu poble dechazer;
    e meta·ns o en tal port
    que nulhs hom no·y prena tort,
    quar elh no falh ad ajuda,
  20 sol qu'om la·y deman deguda.
     
III   Qu'ancmais lunhs faitz tant no fo
    per tantas gens deziratz,
    ab tant de gaug restauratz,
    quon qu'az onor de prezo
  25 yssis ez ab bosaber
    mo senher; quar jorn e ser
    per gens de quascuna sort,
    suau e cridan mot fort,
    n'era pregatz ab saubuda
  30 Dieus, que l'a honor creguda.
     
IV   Per qu'ieu lo prec que perdo,
    per dever, quant n'er pregatz
    humilmen, si perdonatz
    vol esser, e garde quo
  35 fo e quon es, quar saber
    pot e deu quant pot valer
    senhers que truep desacort
    el sieu, sotz autruy ressort;
    quar gens contra luy moguda
  40 lo fai levar en vil bruda.
     
V   E pus d'acuzacïo
    es ab lo rey escuzatz
    frances, on es lialtatz,
    al qual Dieus aiuda do
  45 en totz bes, sapcha caber
    el sieu grat, ab captener
    degut ez ab bo conort
    que paresca, que·l recort
    dels senhors qu'an defenduda
  50 Narbona e retenguda.
     
VI   Le pobles deu jorn e ser
    Dieu lauzar ez honrar fort
    de Narbona, quar estort
    a son senhor ab mouguda
  55 de gran gauch per sa venguda.
     
VII   Pros coms de Foys, mout saubuda
    es d'est fach la vostr'ajuda.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI