Soltau, Otto. Die Werke des Trobadors Blacatz. "Zeitschrift für romanische Philologie", 23 (1899), pp. 201-248.

Code: 097,006 Auteur: Blacatz Genre: Canso Numero: IX, a

Lo belz douz tems me platz

		En Blacatz.
I	1	Lo belz douz tems me platz
		E la gaia sazos
		E·l çanz de·ls auçelos
		E s’ieu fos tant amatz
	5	Com sui enamoratz
		Fera gran cortezia
		Ma bella douz’ amia ;
		E pos nuil be no·m fai,
		Et eu donc qe farai ?
	10	Tant atendrai aman
		Tro morrai merceian,
		Pos il vol c’aissi sia.
II		Aissi·m son autreiatz
		Ab leial cor a vos,
	15	Bella dompna e pros,
		Qe nuilç autre solatz
		Ni autr’amors no·m platz
		Ni autra drudaria
		Ni mos cors no·s cambia.
	20	Per vos, dompna, morrai.
		Car me trobaz verai
		Vos i prendetz lo dan ;
		E non es benestan
		C’om eis los sieus aucia.
III	25	Dompna, vostra beutatz
		E las bellas faizos
		E·ill beill oill amoros
		E·l genz cors be taillatz,
		Don sui empreizonatz
	30	De vostr’amor, qe·m lia —
		. . . . . . . . . . . . . . . . .
		Ia de vos no·m partrai,
		Qe maior honor ai
		Sol en vostre deman
	35	Qe s’autra·m des baisan
		Tot cant eu li qerria.
IV		Be·m tengra per honratz
		E per aventuros
		S’aprop cent braus respos
	40	En fos d’un ioi pagatz.
		Ha ! dompn’, humilitatz
		E merces no·m valria ?
		Mes m’avetz en tal via
		Dont no·m desebrarai,
	45	Qe mos fis cors s’atrai
		A vostra beutat gran,
		Qe·m fai soffrir l’affan
		E·m destreing noit e dia.
V		Si per sofrir en patz
	50	Mais d’altra ren, c’anc fos,
		Ni per far volontos
		Las vostras volontatz,
		Dompna, m’ochaiszonatz
		A vos non escharia,
	55	Qar il no ss’es ges mia
		Ni ves vos no l’aurai,
		Anz franchamen m’apai
		Qan vei vostre semblan,
		E can vos sui denan
	60	Tot tort vos fuziria.
VI		Bella Cap’, on que·m sia,
		Vos am e·us amarai
		Ab leial cor verai
		Per zo qe valetz tan
	65	Qar eu e·ill plus prezan
		Volem vostra paria.