Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Code: 225,008 Auteur: Guilhem de Montanhagol Genre: Canso Numero: VIII

Non estarai, per ome que·m casti

I	1	Non estarai, per ome que.m casti,
		Qu’ieu non do joi, pos amors m'en vol dar,
		Ez ab gai so de guaya chanson far
		Qu'ieu jauzisca los fins amans e mi;
	5	Quar no·ns platz jois quan li autre son irat
		Per qu'a nos son tug jauzimen donat,
		Qu'estiers no·s deu nulhs om d'amor jauzir,
		Si ben no·s sap de falhimens chauzir
		E·l ben e·l mal mercean non jauzia.
II	10	Sabetz per que tem ar que venh' a fi
		Amors, dompneys, pretz e tot ben estar?
		Quar li plus ric que·lh degran mercear
		Vezem los plus que·l tornon en decli;
		Pero a cels que·n son aissi lognat
	15	Logna ilh joi, pretz e tota bontat,
		E promet si, si ja·l poira tenir,
		Que non volra de lur nulh prec auzir;
		Ez ieu vuelh ben que·lh fals truebon bauzia.
III		Mas d'amor tem que.lh si' a far aissi,
	20	Per malvastat que vei part pretz prezar,
		Com al savi fo ja que·s saup triar
		De la plueja que·ls autres enfolli,
		Per que lui sol tenio·lh fol per fat,
		Tro qu'en viret son sen ab lur foldat
	25	E anet s'en en l'aiga ad enfollir;
		Qu'aitals temps cor que mals es a falhir,
		Qu'estiers non vei on pretz trobe gandia.
IV		Per so m'ondra amors per lo plus fi,
		Que vol qu'ieu chan per lo sen alegrar,
	30	Quar me conois plus fin ad obs d'amar
		E quar anc jorn vas lei non y falhi;
		Per qu'ieu li en ren mil merces de bon grat,
		Qu'ilh a mon cor en tal ric loc pausat
		Qu'a mi·n creis jois quan ben pes ni m'albir
	35	Co·s fa midons part la melhor grazir
		Ab conhde pretz e mais de senhoria.
V		Mas ieu faz com fe le cers, que quan vi
		L'ombra dels bans en la fon bandejar,
		De·s gran erguelh, tro que pres a gardar
	40	Vas sos secs pes, e non s'amet aissi
		Com per los bans, quar pario·lh delgat;
		Pero los pes l'avion restaurat
		Tro·l feiron pueys los corns prendr' e aucir;
		Qu'ieu lais per lei que m'auci de desir
	45	Mans de plazers qu'amors d'autras daria.
VI		Mas, part l'onor, es grans profegz qu'om tri,
		Anz qu'om del tot se dey' abandonar,
		Loc conoissent aut e car, quar gardar
		Deu ben amans que foldatz no·l gali.
	50	Mas vos, amors, m'en avetz ben gardat,
		Que·m fatz amar lei qu·es flors de beutat,
		De totz los bes que domna fan grazir.
		Sabers me falh a·ls sieus grans laus complir,
		Mas, s'a lei platz, per tot m'ondri d'amia.
VII	55	Tan a de sen N'Algay’ e de rictat,
		E quar li platz quar mi vol mantenir,
		Qu'ab lei vuelh far totz temps mos cans grazir
		E a mi dons, cui que plassa o greu sia.