Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Code: 225,014=437,030 Auteur: Guilhem de Montanhagol , Sordel Genre: Tenso (Partimen) Numero: XIV

Senh'En Sordel, mandamen

I	1	Senh'En Sordel, mandamen
		Ai del ric comte plasen
		Proensal qu' a pretz valen
		Que·us deman si·us plairia
	5	Mais, ni·us parria plus gen
		Que saupes vostr' amia
		Vostre cor, si com l'amatz,
		O que vos lo sieu sapchatz,
		Si·us am' o etz galiatz.
	10	Chauzetz a vostra guia
		Qu’ieu say be qual penriatz,
		Qui no·us en reprendia.
II		Montanhagol, per un cen
		Me seria plus plazen
	15	Que cylh per qu'ieu muer viven
		Saupes be, on qu'ilh sia,
		Mon cor cuy ten en turmen,
		Que s'ieu lo sieu sabia.
		Quar si·lh mostrava vertatz
	20	Cum suy per lieys turmentatz,
		Penria li·n piatatz,
		O totz sos cors seria
		Durs com peire, freitz cum glatz,
		Tan que merce n'auria.
III	25	Sordel, mais val veramen
		Sapchatz lo cor e·l talen
		De lieys qu'amatz finamen,
		Si·us am' o si·us gualia.
		Quar soven sotz bel parven
	30	Se rescon gran falsia;
		E, si·us trobatz enguanatz,
		Trop semblaretz forsenatz,
		Si pueys amatz desamatz,
		Ni seguetz la follia,
	35	Quar pueys qu'om ve sas foudatz
		Fols es si no·s chastia.
IV		Montanhagol, yeu no pren
		Per lieys lunh galiamen
		Cuy am e sierf lialmen,
	40	Si be·lh plai que m'aucia,
		Per que mon fin cor, qu'ieu·lh ren
		Vuelh sapch', on qu'ilh estia,
		Quar leu m'er en joy tornatz
		Le dols don suy trebalhatz,
	45	Pus sabra sos cors prezatz
		Cum languis nueg e dia,
		Ni qu'en lieys cuy suy donatz
		Es ma mortz e ma via.
V		Sordel, yeu tenc a non sen
	50	Qui en autruy chauzimen
		Met son fach, qu'adrechamen
		Per si far o poiria;
		Per qu'ieu tenc a mais valen
		Que saupessetz la via
	55	Del cor e totz sos pessatz.
		De la bella don chantatz,
		Que s'ilh sap cum la cujatz
		Enganar, si·us crezia.
		S'es aitals cum la lauzatz
	60	Foll’ er s'en vos se fia.
VI		Pus fi de mi eys prezen,
		Montanhagol, franchamen
		A lieys que m'a ses conten,
		No fuy en ma bailia,
	65	Enans ai estat languen
		Fis en sa senhoria;
		Don s'era ben acertatz
		Sos cors don mieus es greujatz,
		Leu seria coronatz
	70	Del joy qu'ueymais deuria
		Venir, don suy totz secatz
		D'envey' e de feunia.
VII		Sordel, le ricx coms prezatz,
		On es fis sabers triatz,
	75	Proensals, jutje, si·lh platz,
		Esta nostra partia,
		Qu'ieu enten qu'om vius ni natz
		Mielhs no la jutjaria.
VIII		Quar mos senher es lauzatz,
	80	Pauc duptans et pro duptatz
		Per sels cuy es desamatz,
		Montanhagols, li sia
		Le jutgamens autreyatz,
		Tortz o dregz, quais que sia.