Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,081 Auteur: Guiraut Riquier Genre: Vers Numero: XXV

Tant m'es l'onratz, verays ressos plazens

		LO XXVI VERS D'EN GR. RIQUIER, L'AN M[CC]LXXXXI, EL MES D'ABRIL.
I		Tant m'es l'onratz, verays ressos plazens,
		ples de lauzor, del senhor n'Amalric,
		del mieu senhor filh premier, n'Aimeric
		de Narbona, que mos cors n'es jauzens,
	5	qu'entre·ls Toscas s'es tant gent capdellatz,
		que·ls amicx a de la gleysa honratz
		e·ls enemicx mortz e vencutz per guerra.
II		Mout es avutz belhs sos comensamens
		de nobles faitz, ab sen ez ab cor ric,
	10	que, so·n sembla, a l'aut dever antic
		que l'essenha d'onor esser manens
		de Narbona, don sia Dieus lauzatz;
		pero per Foys li ven, de l'autre latz
		devers, que·s deu tener a sojorn gue[r]ra.
III	15	L'onratz Comus de Florensa valens
		ac bon cosselh quan al rey lo queric
		per capitani, quar sey enemic
		ne son al bas, don es sieus l'onramens
		per luy; don deu per tot esser lauzatz
	20	e car tengutz, ab tot que aia patz,
		quar si honran, l'a gent honrat de guerra.
IV		Si honran, a honratz sos benvolens
		e Narbona, e·l bon rey que seguic,
		e Foys e selh que·n partida·l noyric;
	25	quar anc no·l fes nescïejar jovens,
		ans, es ab sen, curos ez atempratz,
		don es per totz sos enemicx dubtatz,
		tant que lur es sos ressos pieitz de guerra
V		De Dieu li ven sos bos captenemens,
	30	per qu'ieu li prec e li cosselh e·l dic
		que·l retenha quon senhor ad amic,
		ab humil cor de totz vils faitz temens;
		e creysser l'a en totas sas bontatz,
		si s'afortis contra vils voluntatz:
	35	quar aissi vens hom espirital guerra!
VI		Lo senhor prec, n'Amalric, qu'enansatz
		sia per luy sos pretz gent comensatz,
		en totz sos faitz, aissi quon es per guerra.