Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Code: 330,007 Auteur: Peire Bremon Ricas Novas Genre: Canso Numero: VI

Iratz chant e chantant m'irais

I	1	Iratz chant e chantant m’irais,
		c’a chantar m’aven, mas be·m pes ;
		et es meills qu’eu chant que m’o lais,
		si tot ma dompna·m traïna.
	5	Traïna me il ? — Oc. — Per que ?
		— Non sai ; mais nuls jois no me·n ve.
II		Ges non sapcha lo ram que·m nais
		del mal que m’a lassat e pres ;
		non cug la dolor ges m’apais ;
	10	mas il me·n pot far mezina.
		E fara·l me il ? — Non. — Per que ?
		— No·l platz per als non laissa re.
III		Gran mal mi fes qui la·m pertrais,
		mas lo mals, si Dieu platz, m’er bes :
	15	com plus es desiratz granz jais
		mais val, e quant plus traïna.
		Mout ai dig que fols. — E per que ?
		— Ben leu plus tart n’aura merce.
IV		Dos ans ai atendut et mais
	20	lo don que·m covenc e·m promes ;
		mas ara sai que mans fols pais,
		so di lo reproviers, farina.
		Mout ai atendut. — E per que?
		— Dieus don’en pauc d’ora gran be.
V	25	Mi donz m’autrei, si tot mi trais ;
		e·ls mals que so non fai ilh jes ;
		e sel menti que m’o retrais ;
		anz es vas mi pur’e fina.
		Fols es qui mal me·n di. — Per que ?
	30	— Car se tot s’es vers eu no·l cre.
VI		Era sui plus que non suoill gais,
		car ai lai mandat, on il es,
		c’apropce tarit vas mi que·m bais,
		ans sai si vieingn’a tapina.
	35	Mout ai faig gran orgoill. — Per que ?
		— Car l’ai mandat que·lh vein’a me.
VII		Ergoill ai faig ; non ai per que
		il aus ... miels venir vas me.