Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 076,005 Auteur: Bertran d'Alamanon Genre: Sirventes Numero: VII

De la ssal de Provenza·m doill

I	1	De la ssal de Proenza·m doill
		Car al meu port no·n passa re,
		E car no i prenc zo qe soill
		Fort m’enueia, cascus o cre.
	5	Mais segners faill qe·ls seus descor’,
		E qant pot ben auer lur cor
		E bon’ amor de tot son cumunal,
		Qe nuls trazaurs a senor tan no val.
II		La sal an mes a tan gran for
	10	Per q’eu tem fort e tem ancor
		Qe·l proverbis q’es tan diz torn en mal :
		« Condugz ab carn totz es perdutz per sal »,
III		Qi aital ortolan acoil,
		Paor deu auer per ma fe,
	15	Que no·il faria mal en l’oill
		Ren q’aia de ben entorn se ;
		Mas cre q’el o fai per demor
		Car taliet cen nauz part son tezor,
		E no·us cuides q’el o fassa per mal,
	20	Car a totz part son auer per egal.
IV		En Bonafaci a ric cor
		E non es ges cassatz el cor,
		Qu’el don’ als sens e los garda de mal ;
		Per que li son trastuit bon e lial.
V	25	Sel ques a comparatz a troill
		Nos tenon sai estret lo fre,
		E nos tenon lo cap el soil,
		E no·i trobam nulla merce ;
		Mas non es senblanz ges encor
	30	Qe getez sos enemics for
		De sa terra, on li fazion mal,
		E·ls francs baros degra far altretal.
VI		De la sal non an ges per lor,
		Anz li son tuit li autre for,
	35	Que non n’an trait ensems un plen grazal,
		Don pro uerbis e pesatges pauc val.
VII		Qi mal semena mal coill,
		E qi mal penza mais li ve,
		E qi mal mi fai mal li voill
	40	E prec Dieu que de mal l’estre ;
		Don d’aisso m’alegr’ e·m demor,
		E n’ai gran plazer e mon cor,
		Qe Dius non gic a venjar ben ni mal,
		Per qu’en seran tuit venjat tal e tal.
VIII	45	Flacs baros, viz eus metes for
		Descoratz, e noi ontasses cor,
		E membre vos del cor de la sal,
		Si non, ja mais non seretz Proenzal.