Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 076,008 Auteur: Bertran d'Alamanon Genre: Sirventes Numero: VIII

D'un sirventes mi ven gran voluntatç

I	1	D’un sirventes mi ven gran voluntatç
		Ce·l fas’ ausir a tutç cominalmen
		E qu’ieu dirai de las grantç poestatç,
		De cells ques an de l’enperi conten,
	5	C’al mieu senblan il regnan folamen,
		E·l papa mal, car los ten e balansa.
		Be·m merauegll car igll an esperansa
		Ques a nengun en fas’ autregiamen,
		Puois c’el a d’els renda d’aur e d’argien.
II	10	Al papa val l’enperi e·l regnatç
		Mais ce sc’era tut sieu domeniamen ;
		Car plus monta l’auers c’es presentatç
		Per acest plai a lui e a sa gen
		Ce li renda ce us enperaires pren ;
	15	E puois d’auer n’a tan gran aondansa,
		No mi sembla ce ga·i met’ acordansa,
		Ces ell non a en alre son enten,
		Per ce lo monç n’es tut e turbamen.
III		Gia aices platç non er sentençiatç.
	20	Puois ce li rei uolon abreuiamen,
		Ab caualiers et ab cauals armatç
		E ab uasal bon de concerimen
		Vegna cascus apoderadamen,
		E en un camp fasan un’aital dansa
	25	Cal departir gasague l’uns l’onransa ;
		Puois decretals no·i noseran nien,
		Puois troberan lo papa bendisen.
IV		Aicell sera fil de Dieu apelatç
		Ce aura fait al camp lo uensimen ;
	30	Pe los clerges [el] er leu coronatç,
		Car il veran c’ aura·n l’afortimen ;
		Adonc seran tutç a sun mandamen,
		Car ades an clerges aital uçansa
		Ce, can trobon pairo de gran puisansa,
	35	Tut cant il uol fan ben e umilmen,
		E puois sun dan, quan veison ce deisen.
V		E si als reis so c’ieu lur dic non plas,
		Als podon far, ces er miels per un sen,
		Ces outramar si pert crestiandas,
	40	E si pason apoderadamen,
		Remanra tot so de c’om los repren ;
		E autresi pases lo rei de Fransa,
		El aunt primers, ses longia demoransa,
		E·l reis Gaumes, qu’a l’astr’e l’ardimen
	45	Del Serasis mescre gens d’autra gen.
VI		Assas ai dic a cascun, si m’enten,
		Dels autç princes, e ai ferma speransa.
		Ce, s’il pasan ses longia demoransa,
		Cristiandat garderan d’aunimen,
	50	Gaçainhan Dieu e pres e saluamen.
VII		Reis castelans, car soberanamen
		Est soiberans de fin preis et d’onransa,
		Donas vos suoign, segner, qu’ieu ai dutança
		Ce vostre pres non prenna mermamen,
	55	E faitç, segner, ce·l tengas autamen.
VIII		Dell papa sai ce dara largamen
		Pron del perdon et pauc de son argen ;
IX		E s’outra mar non fan seccors breumen,
		Li terra·s pert ses tot revenimen.