Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,061 Auteur: Guiraut Riquier Genre: Vers Numero: XIX

Ops m'agra que mos volers

		LO XXUS VERS D'EN GR. RIQUIER, L'AN MCCLXXXVI EN FEBRIER.
I		Ops m'agra que mos volers
		s'acordes ab m'entendensa,
		ab sen ez ab conoyssensa,
		per que·s complis mos espers;
	5	mas no·l puesc apoderar,
		ans me fa forssat passar
		soven otra mon dever,
		ab pezar o ab plazer.
II		E say que per los plazers
	10	va mos cors a dechazensa,
		dels pezars port malvolensa
		e·l tot esme non devers;
		e per lo voler blasmar,
		no·m puesc ab Dieu escuzar,
	15	quar razos ab bon saber
		deu en tot penre poder.
III		Mas non es tals mos poders,
		que soven volers no·l vensa
		per esper de penedensa,
	20	ez aquo non es sabers,
		quar mans ne fa trabucar
		mortz, en aquelh esperar,
		que non an plenier lezer,
		ez aquo devem temer.
IV	25	En Dieu sia mos temers
		e ma fes e ma crezensa,
		e don me tal pacïensa,
		que patz sia mos lezers,
		e·l puesca ferms adorar
	30	e lauzan glorificar,
		ses d'esperansa cazer,
		ab fin que·m denh retener.
V		Quar sos honratz reteners
		es de totz plazers creyssensa
	35	e vida ses defalhensa,
		don temor no fa cazers,
		e gaugz ses als dezirar.
		Doncx elh, que sols o pot far,
		nos don en luy tal esper,
	40	que als no puscam voler.
VI		Ses tu, vers Dieus, aizinar
		no·ns podem de lunh ben far,
		donc fai nos via tener,
		que vivam al tieu plazer.
VII	45	Maires de Crist, ton filh car
		prega per nos, que·ns ampar
		e que·ns garde de cazer
		a la fin en desesper.