Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Code: 132,005 Auteur: Elias de Barjols Genre: Canso Numero: I

Belhs-Guazanhs, s'a vos plazia

I	1	Belhs-Guazanhs, s’a vos plazia,
		ben fora sazos
		que·l vostre cors belhs e bos,
		humils, de doussa paria,
	5	fos d’amor tan cobeitos ! :
		pus negus non es tan pros
		que·us o digua ni que ia sapcha·i tan
		que vos o aus dir ni que vos o man.
II		Qu’ieu sai qu’a vos tanheria
	10	amics cabalos,
		tals don res a dir no fos,
		aitals cum ieu chauziria ;
		farai n’un tot nou qu’er bos :
		e penrai de las faissos
	15	de quadaun, de las melhors qu’auran,
		tro vos aiatz cavalier benestan.
III		N’Aymars me don sa coindia,
		En Trencaleos
		sa gensozi’, En Randos
	20	donar, qu’es la senhoria,
		e·l Dalfis sos belhs respos ;
		En Peyr cui es Monleos
		do·m son guabar, e volrai d’En Brian
		cavallairi’, e·l sen vuelh d’En Bertran.
IV	25	Bels Castellas, cortezia
		vuelh aver de vos
		e volrai que·m do N’Eblos
		covit, que plus no·n penria ;
		En Miravalh sas chansos,
	30	En Pons de Capduelh do nos
		sa guaieza ; En Bertran La Tor man
		sa drecheza mi do e no·m soan.
V		Aital l’auretz, ses fadia,
		guai et amoros,
	35	belh e ben fait e ioyos
		e ple de cavallairia ;
		et es ben dreytz e razos
		que vos l’ametz et elh vos,
		qu’assatz seretz ambeduy d’un semblan,
	40	sol no crezatz fals lauzengiers truan.