Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Code: 076,019 Auteur: Bertran d'Alamanon Genre: Canso Numero: XXI

S'ieu agues uirat l'escut

I	1	S’ieu agues uirat l’escut
		Vas lei qe tan m’a dit no.
		D’autra part fera mon pro
		O ill m’agra retengut.
	5	Mas aisso·m teing a non sen
		Qe tan tem son chausimen :
		Q’eu sai qe be no·m faria ;
		Pero no·m sobra feunia,
		Qe ia per re la pogues oblidar ;
	10	Qe fols no·s pot de folia laissar.
II		Cel iorn m’agui decebut
		Qam me mis eu sa preso ;
		Qe meillz me fos q’en greillo
		M’aguessen mes li Masmut ;
	15	Q’eu n’eissira ben e gen
		Ab amics o ab argen
		O eu m’en fugira un dia ;
		Mas sai fugir non poria,
		Ni hai amic qe m’en posc’ aiudar,
	20	Ni eu meteis no m’en sai conseillar.
III		Dompna, e·us am, e·us amaria
		Dos tanz, si bes m’en uenia ;
		Mas qar sabez q’eu no·us posc desamar,
		Mi faitz orgoill, qar eu non lo posc far.