Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Code: 124,013 Auteur: Daude de Pradas Genre: Canso Numero: V

Pois Merces no·m val ni m'ajuda

I	1	Pois Merces no·m val ni m’ajuda,
		ges de chantar non ai razo ;
		mas qui pot, de razon perduda,
		far mot plazen ab leugier so
	5	assatz deu esser plus grazit,
		car mot ses razon son faidit ;
		e qui no·ls capte ab dir gen,
		son perdut, e·l sos eissamen.
II		Anc de datz non puoc far tenguda,
	10	anz get totz temps a l’autrui pro ;
		e ges per so mos cors no·s muda
		c’ades non joc, tant mi par bo ;
		car de beutat mi fai envit
		e mostra de fin pretz complit
	15	cil que vai en triga volven
		mon joc, que, per par, re noi pren.
III		Ja mais per me non er saubuda
		l’amors que·m ten en sa preiso ;
		anz la tenrai ben resconduda,
	20	e dirai ben c’anc res non fo.
		E pois vei que no m’es cobit
		que si’ astrucs en joc partit,
		jogarai sols, privadamen,
		ab Amor e ab pessamen.
IV	25	Ben es paraulla conoguda,
		que « trop servirs tol guizerdo » ;
		e tost es grans onta venguda,
		qui·s pliu trop en fol compaigno.
		Mos cors e miei huoill m’an trahit,
	30	car si feiron tant issernit
		qe·m consseilleron per non sen
		q’ieu descobris tot mon talen.
V		Dompna, lonc temps vos ai volguda,
		mas ar vos qier, si·us platz, perdo,
	35	car anc penssai qe·m fossetz druda,
		pois mi tornez vostr’oc en no.
		Ja mais per vos non querrai guit
		de lausengier ; car, per un crit,
		vos donetz tant gran espaven,
	40	qe·m faillissetz de covinen.
VI		Bels Jois Novels, ja tant petit
		non pensaretz q’ieu vos oblit ;
		anz vos amarai finamen,
		mas si·us prec plus, estrangol m’en.
VII	45	Amics, Nostre Seinher vos guit,
		car en vos son bon aip complit,
		e vos mantenez veiramen
		Prez e Valor, Joi e Joven.