Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Code: 124,014 Auteur: Daude de Pradas Genre: Canso Numero: VI

Puois amors vol e comanda

I	1	Puois amors vol e comanda
		q’en cantan mon cor retraia,
		ben dei far canson que plaia
		als amans, on que s’espanda,
	5	c’autres non vuoill de chant servir ;
		car non conoisso·l gai desir,
		que·l cor aflama e enpren
		de cel que ama finamen.
II		Qui ben ama petit blanda
	10	si donz, pois la sap veraia,
		que non er, si trop l’asaia
		ni del tot s’amor demanda,
		non ai’ enoi a·l escondir.
		Pregon per lui huoill e sospir,
	15	esforz [se] de be metre e gen,
		que tals precs vol dompna q’enten.
III		Tant m’esclaira e m’abranda
		us douz rais c’al cor mi raia,
		c’ ades vei so que m’apaia ;
	20	e s’era neus en Islanda
		de lai venria sai chausir
		cella que sap, al departir,
		mon cor entaillar soptilmen
		en si mezeus, si q’ieu lai sen.
IV	25	Qu’en tant cum lo cels garanda,
		no nasquet dompna tant gaia,
		tant valens ni que tant aia
		so que fins pretz vol e manda :
		gen sap parlar e acuillir
	30	e dompnejar e retenir
		ab bel semblan tota la gen,
		et amar un sol coralmen.
V		Lai on hom ditz : « Si’ a randa »
		vuoill que ma chansso·s retraia,
	35	que chausimen e men aia.
		Non conosc c’aillors resplanda.
		Lai pot hom bon pretz mantenir,
		car Dieus i volc tan gen assir
		un castel fort e avinen,
	40	q’es flors de joi e de joven.