Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Code: 124,018 Auteur: Daude de Pradas Genre: Canso Numero: IX

Trop ben m'estera si·s tolgues

I	1	Trop ben m’estera si·s tolgues
		Amors de mi et ieu d’Amor ;
		q’ieu no·n ai re mas la dolor,
		et ill vol de mi totz sos ses :
	5	q’ieu chant e·m deport e·m solatz,
		non per mi, mas car a lieis platz ;
		e ill non faria per me
		neis mal, si·m cujava far be.
II		Amors, ab vos no·m val Merces,
	10	ab franquesa ni ab dolor ;
		car vostr’orguoill, vostra ricor,
		non vens humilitatz ni bes.
		S’om vos blandis, vos menassatz ;
		Qi·us menassa, vos sopleiatz ;
	15	e qi·us ama, nuill pro no·il te ;
		e qi·us vol mal, gau s’en desse.
III		Amors, de vos ai tant apres :
		qe·il fals truan e·il trichador,
		que non temon Dieu ni honor,
	20	e·is feignon de non ren cortes,
		ant de vos lo baisar e·l bratz,
		e, per malaventura, jatz,
		e vers amics de bona fe
		non aura ja ni so ni que.
IV	25	De dompnas hi a mais de tres,
		que, qand remiron lor color
		e lor beutat el mirador,
		non cujon que sia mais res.
		Pauc ant ben legit, so sapiatz,
	30	cum beutatz vai e fail viatz,
		q’en pauc d’ora plus bella ve
		aco sem que sol vezer ple.
V		Un an volgra que s’avengues
		que s’accordessen entre lor
	35	cil que son leial amador,
		que ja negus precs non fezes ;
		c’adoncs paregron li malvatz
		e las malvazas a un latz,
		q’ant mort dompnei e joi ancse,
	40	pels baratz que fan entre se.
VI		Bels Sirventes, de vos mi platz,
		que ma chanson primiers aujatz,
		e ja hom no·m deman per que ;
		mas car vos am aitant cum me.