Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Code: 124,011 Auteur: Daude de Pradas Genre: Canso Numero: XII

No cugiey mais ses comjat far chanso

I	1	No cugiey mais ses comjat far chanso ;
		mas ar m’ave, mal grat mieu, far parer
		lo pensamen q’el cor no·m pot caber,
		tan m’en a dat silh a cui ieu me do.
	5	Per q’ieu comens, a ley de cossiros ;
		e si mos chans non es molt amoros,
		ia non rept’ om mas amor e merce,
		quar si·m volguesson portar bona fe
		ia no si·m feira midons tan estranha.
II	10	A penas say que·m sia mal ni bo,
		tan suy marritz e ples de nonchaler ;
		car s’ieu del tot d’amor mi dezesper,
		ges per aitan non hiesc de sa preizo.
		Que farai doncx ? Suffrirai pezansos,
	15	e atendrai tro que venha sazos,
		que·l dezamat suffren trobon merce ;
		e no dirai : « S’autre pro noqua·m te,
		a tot lo meyns midons que mi remanha ! »
III		Ai, fin’ amors, ab tan pauc guizardo
	20	pogratz mon cor en gran ioya tener,
		sol que fezes a lieys cuy am saber
		de quan bon grat me mezeus l’abando ;
		(E si d’aitan no voletz neus mos pros,
		sivals que no mostratz li qui etz vos).
	25	Mas noi anetz que noy menetz Merce,
		qu’adoncx seran aiustat tug li be
		e sobrar l’an a qui que d’elhs sofranha.
IV		De mon dan cug, amors, q’ieu·s muou tenso,
		on plus vos dic qu’anetz mi dons vezer ;
	30	q’ades la vey ses vos aitan valer
		que mais non cug m’escoutes a razo
		pus aura fait son cors de ren ioyos ;
		que sa beutatz mi fai aissi duptos,
		q’umilitat, chauzimen e merce
	35	e vos mezeusa per pauc no mescre
		qe·us des erguelh, si·us vol en sa companha.
V		Mas nopertan endreit vos la somo,
		qu’al sieu servir mi denhes retener ;
		e s’a lieys platz qu’ieu aia nul plazer,
	40	membre li d’oc e oblit li de no ;
		e s’ieu sui fols no·m fezes enuios ;
		renda·m merces aquo que·m tol razos,
		quar s’ieu no puesc ab lieys trobar merce,
		cuy am e vuelh e dezir mais que re,
	45	no sai vas qui de ma dolor mi planha.
VI		A Fol Conselh t’en vai ades, chansos,
		e diguas li q’ieu no truep sai merces
		ab Joy Novelh, si Mals Aips no·m capte,
		a cui m’en torn, pas tan gen mi guazanha.