Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Code: 124,015 Auteur: Daude de Pradas Genre: Chanson religieuse Numero: XIII

Qui finamen sap cossirar

I	1	Qui finamen sap cossirar
		lo dous dezir, lo dous pensar,
		que fis cors a per fin’amor
		finamen ab fina sabor,
	5	en fin’amor si deu fizar.
		Amors vens tot’autra doussor.
		Quals amors ? Silh que tot perpren,
		ses fin e ses comensamen.
		Dieus es fin’amors e vertatz ;
	10	e qui Dieu ama finamen,
		finamen es de Dieu amatz.
II		Totz hom qui ben pot afinar
		son cor en Dieu, e desamar
		so que Dieus ten a desamor,
	15	d’amor sent aissi bon’odor
		que nulha res no l’es amar.
		Amar deu hom ben tal senhor
		que nostra mort aucis moren :
		vencutz d’amor, venquet sufren.
	20	Finamen amet desamatz.
		Elh es qi·l ben d’amor enten :
		Amors part totas amistatz.
III		Bos es e vol sos bes mostrar ;
		sos bes als bos no vol celar.
	25	Del mal fai bon, del bon melhor ;
		be fai al bon, neys al pejor
		fai be, quar totz los vol salvar.
		Qui be vol prec lo salvador,
		quar elh es cel bes veramen
	30	que mena·ls bos a salvamen.
		Elh es salutz e salvetatz,
		bes sobre·ls bes ; qui tal guiren
		aura, per lui sera salvatz.
IV		Dompna, tu non aguist anc par,
	35	en cel, en terra ni en mar,
		Verges, maire del salvador,
		totz pretz val part tota valor
		apres selh qu’om no pot prezar.
		Honrada sobre tot’ honor,
	40	tal rei onratz onradamen,
		lo rei dels reis qu’aissi granmen
		per conort a nos totz onratz.
		Apres lui e ses tot conten
		trastotz los gras d’onor montatz.
V	45	Al tieu laus no pot laus montar.
		Quals laus si pot al tieu levar,
		que de totz laus portas la flor ?
		Lo tieus laus fai lauzar lo lor
		de selhs qu’an cor de te lauzar.
	50	Pel tieu laus aug Dieus la lauzor
		de selh qu’en te lauzar s’empren.
		Lo tieus laus es sieus eissamen ;
		del tieu laus se ten per lauzatz ;
		e qui te lauzon leyalmen
	55	ab Dieu es lor cors aloguatz.
VI		Lo solelhs clars fai lo jorn clar ;
		mas sa clardatz enluminar
		no pot lo jorn per sa clardor
		si com tu·l cor de peccador ;
	60	quan be lo denhatz reguardar,
		Dieus ! qual clartat, qual resplandor !
		Rics es qui la ve e la sen.
		Sentir ? Non ! Sent us entre cen.
		Per que ? Quar cossen a peccatz.
	65	Qui peccat sen, pueis i cossen,
		no sen Dieu ni ve sas clardatz.
VII		Qui novelh chan volra chantar,
		chant chan de Dieu ses deschantar,
		qu’el no vol autre chantador.
	70	Tug autre chant tornon a plor.
		Dieus don que no·l puesc’ enchantar
		enchans de mal enchantador
		qui cest chan chant’ alegramen ;
		e qui·l chantet premeiramen
	75	totz tems chant el d’alegratatz ;
		don en chantan mon chan prezen
		a vos, on que sia chantatz.
VIII		Qui cest chan chantara soven,
		de Dieu sia benaüratz !
	80	Diguatz amen ! tug ben-volen,
		que selh vos am cui vos amatz !