Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Code: 124,009 Auteur: Daude de Pradas Genre: Canso Numero: App. II

Al temps d'estiu, qan s'alegron l'ausel

 

  

 

I	1	Al temps d’estiu, qan s’alegron l’ausel,
		e d’alegrer notan dolz lais d’amor,
		e·ill prat s’alegron, qe·s veston de verdor,
		e·s carga·l fuoillz e la flor el ramel,
	5	s’alegro cill qi an d’amor lor voill ;
		mas eu no·n ai d’amor si ben lo·m voill,
		ni pos ni dei aver nuill alegrage ;
		q’alegrer ai perdut per mon folage,
		e s’anc fui gais, era sui d’ira ples.
II	10	Et ai gran dreit q’ab ira me capdel,
		e qe ja mais non dezir foill ni flor ;
		q’anc hom de carn non ac ira major,
		e creis m’ades qan ven al temps novel ;
		et es ben drez se m’ir e·m plaing e·m duoill,
	15	pos la gensor iratz laissei, so·m duoill.
		Pogues vezer don per pauc non enrage,
		mas non m’ir tan q’en lais son seignorage
		ni·s part de leis mos fis cors ni ma fes.
III		Qar si tot sui loing del seu cors joyos,
	20	per ma foudat, q’eu non posc lei vezer
		que fai son pretz plus loing d’autra saber,
		e teing vas lei los oillz del cor amdos ;
		qar on om plus s’en loigna ni s’en part,
		de loing se fai plus pres en tota part.
	25	Tan loing s’espan de mi donz e es saubut
		lo seu ric prez, q’a mon cor retengut,
		qe qan ill m’es plus loing, meill li sui pres.
IV		Per drez l’es pres mos cors, e mas razos
		q’apres mainz mals jausir d’un bon esper ;
	30	e s’eu tan viu q’aprosmar e seder
		me posc’als pes, mout m’er rics guierdos
		de lei on prez poj’a terz et a cart ;
		q’en tot lo mon non laisa ges lo cart,
		ni sen ni laus, qe tot l’a retengut,
	35	dont deu·ill ben lo seu aver cregut,
		s’ella tant fa c’a penas n’a aillors ges.
V		E non per tan, qar eu ai tan falit
		qe si per so me vol far faillimen,
		ben o pot far, e a drez jutjamen ;
	40	qar trop falic mos cors can m’enardit
		q’en Poill’anei ni laisei, s’eu non faill,
		lei cui Jovenz, Prez e Beltatz non faill.
		Laisei ? Non fi, anz faill cobertamen ;
		q’inanz perdrai la vida e·l cor e·l sen
	45	qe n’atenda si me valra Merces.
VI		Qe de merce a mi donz tan garnit
		son franc cors gai, qe s’eu merse n’aten,
		ja mercejan, non cuit, del seu cors gen,
		me lais’aisi ses merce, desgarnit
	50	del seu ric joi don viu e vau e vaill ;
		e s’ab merce·m reten, cor tost, e va·ill
		dire, cansos, que anc merce queren
		non fetz merces mais home tant jausen
		com eu fora si merces mi valgues.