Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Code: 009,004 Auteur: Aimeric de Belenoi Genre: Canso Numero: II

Aissi cum hom pros afortitz

I	1	Aissi cum hom pros afortitz
		Que vol mais ab plus ric de se
		Guerreyar, qu'ab seluy cuy ve
		Plus paupre, mi suy enarditz
	5	D'amar vos, pros domna valens ;
		Quar no·m par bos afortimens
		Qui de luec afortit non trai
		Un ric plazer, quan fort li play.
II		Contra·l vostre cors qu'es complitz
	10	De totz bes, mas sol de merce,
		M'esfortz cum l'aguessetz de me
		En vos servir ab cuenhdes ditz
		Et ab cortes faigz avinens ;
		Qu'ayssi·m par que pro domna vens,
	15	Quan hom de·ls sieus tortz, quan los fay
		Li quier merce, qu'aissi s'eschay.
III		Quar per us fals fenhens voutitz
		Lausengiers, per cui joys recre,
		Ditz pros domn'e fai manta re
	20	Que par erguelhs a·ls afeblitz ;
		Quar d'els mou lo gualiamens
		Don mor fin' amors e jovens ;
		Per que·s tanh que pros domn'assay
		Selhs que si fenhon parlier guay.
IV	25	Quar per folhs semblans es trahitz
		Leyals cors, on es mais que be ;
		Per qu'a bona domna cove
		Que conosca ont es noiritz
		Enjans, ni fals entendemens ;
	30	Qu'ayssi pueja entre·ls valens
		Bona domna en pretz veray,
		Quan guarda que ditz e que fay.
V		Mas ieu suy volpilhs et arditz
		E fols e savis, quan s'ave,
	35	Cortes ab selhs cuy Joys mante,
		E vilas ab los deschauzitz ;
		Quar qui de totz captenemens
		Non es, par que sia fenhens
		E fals lauzengier fan m'esglay
	40	Quar desmesclan l'amor qu'ie·us ay.
VI		N'Audiartz es tant avinens,
		Adrech' e guaya e plazens,
		Per qu' e·l sieu bendir mos cors jay
		Que totz bes ditz, mostra e fay.