Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Code: 009,007 Auteur: Aimeric de Belenoi Genre: Canso Numero: III

Ara·m destrenh Amors

I	1	Ara·m destrenh Amors
		Tan amorozamen,
		Que·lhs mals que·m fai non sen,
		Ans m'es l'afans doussors :
	5	Que la humilhs parvensa
		E·l franca captenensa
		De lieys, per cui m'a pres
		Amors, m'a si conques,
		Que vas on qu'ieu estey,
	10	Lai on la vi, la vey.
II		E quant hieu venc d'alhors
		La gran beutat e·l sen
		Truep doblat doblamen ;
		Per que m'en pren paors
	15	Que Merces no la·m vensa ;
		Mas d'aisso ai plivensa,
		Que anc Erguelhs no·s mes
		En tan franc luec, so·m pes.
		Pero, cum que·m guerrey
	20	Amors, son tals cum dey.
III		Sa covinens colors,
		E·l huelh clar e rizen,
		E·l dous esguart plazen
		E l'honrada valors
	25	M'estan en sovinensa,
		Per qu'a totz jorns m'agensa
		Que mos leyals cors m'es
		Miralhs de totz sos bes ;
		Que, quant alhors cortey,
	30	Pessan, ab lieys domney.
IV		Tant es grans sa ricors
		Qu'ieu non l'aus far parven
		Cum l'am forsadamen,
		Ni non aten secors
	35	Mas de sa conoissensa :
		Qu'ieu l'am ab tal temensa,
		Qu'esgardar non l'aus ges
		Qu'ela·m veya, ni res ;
		Ans, quan guarda vas mey,
	40	S'ieu l'esgart, m'en recrey.
V		Pus aissi·m vens Temors,
		La bella cuy me ren
		N'aya franc chauzimen ;
		Qu'e·l mon non es dolors
	45	Mas trop longu'atendensa ;
		Per qu'ieu fatz tal sufrensa,
		Que, si no·m val Merces
		Ab lieys, e Bona Fes,
		Paor ai que desrey —
	50	E, quar o dic, folhey.
VI		Seigner N'Aimo, quan pes
		Vos cals etz, ni qui es
		Lo segles, ieu no·i vei
		Nulh que tan gen l'esplei.