Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Code: 009,014 Auteur: Aimeric de Belenoi Genre: Canso Numero: VI

Nulhs hom no pot complir adrechamen

I	1	Nulhs hom no pot complir adrechamen
		So qu'a en cor, si tot quan el eis fai
		No·l sembla pauc, ni am'ab cor veray
		Pus que cuja amar trop finamen :
	5	Qu'aytals cujars descreys, e l'autr'enansa.
		Mas ieu non am ges per aital semblansa,
		Ans jur per lieys cui tenc a·l cor plus car,
		Qu'on plus fort l'am, la cug petit amar.
II		Petit l'am ieu, segon so qu'ieu enten :
	10	C'onor ni be, mas tan quan l'am, non ai,
		E, s'ieu l’ames tan cum a lieys s'eschai,
		Ieu fora reys d'amor e de joven
		E de ricx fagz, (mas hom non a honransa
		Par a·l sieu pretz) ; pero, tan gran pezansa
	15	N'ai e mon cor, car los fagz non puesc far,
		Que·ls mals qu'ieu trai degra per faigz comtar.
III		Qu'aysselh que vol, e no pot, per un cen
		Trai pejor mal que selh que pot e fai :
		Car la poders apodera l'esglay,
	20	Que tolh a·l ric l'amoros pessamen.
		Mas silh, en cui ai tota m'esperansa,
		Val tant, qu'ilh sap ab tan fin'acunhdansa
		Conquerre pretz e si eissa guardar,
		Qu'anc pauc ni trop no fetz de nulh afar.
IV	25	Quant e mon cor remir son belh cors gen,
		Lo dous pessars m'abelhis tant, e·m plai,
		Qu'ab joy languisc ; e quar hieu non l'am mai,
		Muer de dezir, on plus l'am coralmen :
		Que tan volgra que·m cregues s'amistansa,
	30	Tro qu'ieu muris, ho qu'ylh n'agues pitansa ;
		Que·l joys d'amor, quan dona·l vol donar,
		Non pot, mas tan quant hom l’ama, pujar.
V		Ni·l dos no val a sselluy que lo pren
		Re, mas aitan quan s'en dona de jai ;
	35	Doncx, si·s penssa midons lo joy qu'aurai
		De·l sieu ric do, s'en lieys Merces dissen
		(Qu'estiers non ai de re nulha fiansa),
		Ylh e Merces faran bon' acordansa :
		Car Merces fai ric dur cor acordar
	40	Ab lial cor, vencut per sobramar.
VI		Vas la bella N'Elionor t'enansa
		Chansos, qu'en lieis pren bas pretz meilluransa ;
		Qu'eu te tramet a lieis per meillurar,
		E se t'aizis, poiras segur anar.
VII		E si·s dona nuill regart a·l passar,
		E nom de foill, vai, e no·t cal doptar.