Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Code: 009,018 Auteur: Aimeric de Belenoi Genre: Canso Numero: IX

Puois lo gais temps de pascor

I	1	Puois lo gais temps de pascor
		Renovell'e ve
		Vestitz de fuoill'e de flor,
		Chantarai desse ;
	5	C'atressi s'es mos pensatz
		De fin joi renovellatz,
		Car mos sobranssiers volers,
		A cui non platz vils plazers,
		A trobat a son talen
	10	Dompna de cor e de sen,
		Orgolliosa et humil,
		De captenenssa gentil.
II		Amar mi fai ad honor
		Mos rics cors ancse,
	15	Ses blasme, e ses follor
		D'autrui e de me.
		C'anc no m'abelli beutatz
		Ni paratges, ni rictatz,
		Si no·i fos sens e sabers
	20	Que fant far e dir plazers,
		E gardar de faillimen
		Dompn' e cel q'en lieis s'enten ;
		Et ai cor tant seignoril,
		C'az autr'amor no m'apil.
III	25	Mas qui vol d'entendedor
		Proar s'ama be,
		Gart son sen e sa ricor,
		Ni cum si capte :
		Que, s'es ben enamoratz,
	30	Li faich e·il dich e·il solatz
		Serant plus ric que·l devers ;
		C'amors non es mas plazers,
		E tuich beill chaptenemen
		Movon d'amar leialmen ;
	35	Mas ieu no·n trob entre mil
		Un qui en sos faitz non gil.
IV		Qui vol aprendre d'amor
		Amar li cove,
		Que ja per enseignador
	40	No·n aprendra re :
		Que fin' amors — so sapchatz —
		Non es als, mas voluntatz
		C'adutz inz e·l cor vezers,
		On la reten Bels-Plazers,
	45	E viu de doutz pessamen ;
		Per c'usqecs am' et enten
		En aut luoc, o en sotil,
		Ves qez a ric cor o vil.
V		Mas tant a fina valor
	50	Cella qe·m mante,
		Que non cre lausengador
		Ni fals dich, so cre ;
		Que·l sieus gens cors rics, prezatz,
		Complitz de totas beutatz,
	55	Conois messonjas e vers,
		Per que non tem far plazers :
		C’ab sen soana e pren
		E jutja tan leialmen
		Que palaitz ten per cortil,
	60	S'om no·i fai faich agradil.
VI		Ni eu non vau plus queren
		Terra ni baron ni gen :
		Tuich autre faich mi son vil,
		Tant mi son li siei gentil.