Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Code: 009,005 Auteur: Aimeric de Belenoi Genre: Canso Numero: XVI

A·l prim pres de·ls breus jorns braus

I	1	A·l prim pres de·ls breus jorns braus,
		Quan branda·ls bruelhs l'aura brava
		E·l branc e·l brondelh son nut
		Pe·l brun temps sec que·ls desnuda,
	5	Per us brus braus brecs de cor
		Trobadors, a bric coratge,
		Fauc breus menutz motz cortes,
		Lassatz ab rima corteza ;
		Qu'ieu ai sen subtil, fin, ferm,
	10	Per lieys don non ai fermansa.
II		E si·m sentis lo cor ferm
		Que·l plagues — be·l fauc fermansa —
		Ja mos chantars tristz ni braus
		No fos, ni de razon brava.
	15	Mas tan mi ten de joy nut
		Cylh que·m don Dieus tener nuda,
		Qu'a penas pens e mon cor
		Nulh joy, tant ai trist coratge,
		Quar de·l sieu bel cors cortes
	20	No·m fai amistat corteza.
III		Be·m tenc per nesci cortes
		Quar ieu de la plus corteza
		En aitals motz dir m'aferm.
		Domna, ve·us m'aissi fermansa :
	25	Pe·l sobretalan qu'es braus,
		E quar ma voluntatz brava
		M'a fag falhir, tot desnut,
		Ab la vostra verja nuda
		M'en batetz lo cors e·l cor,
	30	Tan qu'ieu aia ferm coratge.
IV		Als non dezir e mon cor,
		Mas que Dieus vos do coratge
		Qu'alcun belh semblan cortes,
		Don' avinens e corteza,
	35	Mi fezessetz ab cor ferm
		(Qu'en autra non ai fermansa),
		E no·m fos vostre cors braus,
		Domn' humils, lai on tanh brava,
		Ab cor de totz mals aips nut,
	40	La genser qu'anc nasques nuda.