Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Code: 009,016 Auteur: Aimeric de Belenoi Genre: Canso Numero: XX

Pus de Joy mou e de Plazer

I	1	Pus de Joy mou e de Plazer
		Mos chantars, bela don'e pros,
		Ben deu esser valors en vos ;
		Car tot cant vos plai vey valer,
	5	E val tant vostra valensa,
		Per que·us porton bevolensa
		Tug aysilh que·us venon vezer.
II		De totz sabetz grat retener
		Ab francx ditz et ab bels respos
	10	Et ab guays semblans amoros,
		Ses pus que no·y pot conquerer,
		Qu'avetz bona captenensa
		Per que tot melhur' e gensa ;
		No vey domna mielhs captener.
III	15	Mas si·m pauzatz a nonchaler
		Ni quar en suy tan enveyos,
		Mort m'an vostras plazens faissos
		Que·m feiron ab vos remaner,
		Ses tot autra covinensa
	20	Que l'amorosa parvensa
		Ab que·m mezetz em bon esper.
IV		Domna, aissi·m don Dieus aver
		Lo joy qu'ieu pus dezir de vos !
		Non sai autra de·l cel en jos
	25	Que·m mandes ab lieys remaner,
		(Vejatz s'ie·us am ses falhensa !)
		Que ja pogues m'entendensa
		Vas si trair'e de vos mover.
V		Mout mi tenc per paguatz d'un ser
	30	Que·n fui entre sons poderos.
		Ai Dieus ! e quom era joyos
		Qui·m laysses dormir a lezer..
		No m'o tenhatz a fenhensa :
		Qu'enquer, quan n'ay sovinensa,
	35	Ab pauc non cug blasmatz chazer.
VI		Dona, ric jauzimen n'esper ;
		Si n'agues ferma plivensa.
		Mas sivals, non ai temensa,
		S'ieu no·n l'ay, qu'autre·l puesc'aver.