Mouzat, Jean. Le Troubadour Arnaut de Tintinhac: édition critique des poèmes précedée d'une introduction. S.L.: S. N., ca. 1957.

Code: 034,003 Auteur: Arnaut de Tintinhac Genre: Vers Numero: II

Molt dezir l'aura doussana

I	1	Molt dezir l’aura doussana
		lanquan vei los albres floritz
		et aug d'auzels grans e petitz
		lur chans per vergiers e per plais —
	5	e, qui d'amor ha enveja,
		si·n aquel temps no l'en preja,
		no vueill son lonc respeit mi do !
II		Tot amor tenc per trefana,
		quan bos amicx l'es demezitz,
	10	s'il es falsa ni trichairitz
		mentre qu’el es fins e verais,
		s'al prim comensat vaireja,
		a l'autre torn si sordeja ;
		pueis pren l'avol e laissa·l bo.
III	15	Non dic mal d'amor certana,
		mas membrar vuelh las amairitz,
		que·l cortes no si' escarnitz,
		ni l'amors no·s torn en biais !
		que, pos l'uns l'autre guerreja,
	20	tot lo plus savis foleja
		pos l'amors no vai de razo.
IV		Una gens es soteirana,
		don no·s cela drutz ni maritz ;
		— ricx malvatz, de pretz apostitz ! —
	25	q’uns non a joi ni conortz mais
		qui l’autrui afar gabeja,
		la nueg que·l frons li torneja
		ab lo vi en l’autrui maizo.
V		Mas de mensonja s’apana !
	30	No sai qual s’es plus aveuzitz,
		de lauzengiers lengua-forbitz,
		o cels que crezon digz savais !
		Plus qu’al joc de la correja,
		no sai sobre qual s’esteja
	35	lo mager fais de mensprezo !
VI		Us jois me refresc’ e·m sana,
		mas no·m fo datz ni no·n soi fitz ;
		pero, cui que sia cobitz,
		ieu n’estauc alegres e gais ;
	40	e soi cel qu’en va domneja
		e non baiza ni maneja —
		e maintas gens si·n faun lur pro...
VII		S'aquest jois fluris e grana,
		ja mais non dei esser marritz,
	45	quar sobre totz m'es abelitz
		e non tanh sia brus ni bais,
		que dins lo cor mi blanqueja —
		l'an qu'ieu·n creri que senhoreja
		sobre totz los autres que so !
VIII	50	Sel de Tintinhac si merceja
		ves sidons, a cui s'autreja,
		qu'auj' et entenda la razo.