Mouzat, Jean. Le Troubadour Arnaut de Tintinhac: édition critique des poèmes précedée d'une introduction. S.L.: S. N., ca. 1957.

Code: 034,001 Auteur: Arnaut de Tintinhac Genre: Vers Numero: III

En esmai et en cossirier

I	1	En esmai et en cossirier
		estauc, et en greu pensamen ;
		et mos cors en gran desirier,
		alques per foudat o per sen ;
	5	qar lei que plus am e dezir
		non aus mon talen descubrir,
		ni autr’ amor non puesc voler.
II		Amors me fai gran destorbier,
		e per Amor m’azir soven,
	10	qar no m’a pres a soldadier
		l’amors q’eu dezir et aten,
		qe·m fai sospirar e languir,
		qar tot qant vei ni puesc chauzir
		non dezir tant cum lei tener.
III	15	Mesura·m mou maint encombrier
		e·m dona trop ensegnamen,
		per que me teing que non l’enquier
		lo seu enoi ni·l faillimen ;
		ab que no·m deignes acuillir,
	20	qar tal paor ai de faillir
		qe non l’aus mon prec far saber.
IV		Tant ai ric talent e leugier
		e vau ves lei ples d’ardimen,
		qe·l ditz son verai et entier
	25	qu’ieu voill retraire en cort valen
		mas, quan la vei, ren no·il sai dir,
		anz pes qe miels m’es del sofrir
		qu’auzir greus motz que·m desesper.
V		Las ! per que pert ric joi plenier ?
	30	Verai qu’anc no fis faillimen,
		a me non nozon lausengier,
		ni hom en mon dan non enten,
		ni eu non viu ni puesc morir,
		tan greu pena me fai sofrir
	35	l’amors qu’eu pert per trop temer !
VI		Siei oill son bon e prezentier ;
		e sa cara fresc’ e rizen,
		e·l franc coratge dreiturier
		que anc ves home no s’esten,
	40	no sai que·m posca devenir,
		que totz bes m’es greus ad auzir
		si ela·m get en nonchaler.
VII		Vai, di li·m gent, franc messatgier,
		si·l plai, que·m prend’ en chauzimen,
	45	e parla·ill bel ditz al sobrier,
		e, si t’acoill, torna corren !
		qu’ab te pueis miels sai devezir
		so qu’eu non puesc lai ademplir,
		tro per altrui en sapcha·l ver.
VIII	50	E si·l plai que·m deign’acoillir,
		sai torna·l joi qu’eu tant desir
		tost, ab que·m get de nonchaler.
IX		Mas si no·m deigna acuillir,
		lo desconort no·m tornes dir,
	55	qu’eu no·l voill auzir ni saber !