Bec, Pierre. Les saluts d'amour du troubadour Arnaud de Mareuil. Toulouse: Édouard Privat, 1961.

Code: 030,II Auteur: Arnaut de Maruelh Genre: Salut d'amor Numero: II

Dona, sel qe no pot aver

	1	Dona, sel qe no pot aver
		Joy s'a vos no ven a plazer,
		L'oms e l'amics vers e corals
		Que non pessa d'autres jornals
	5	Mas com pogues so far e dir
		Don vos pogues en grat servir,
		Sel qe per vos languis e mor
		E qe·us ama de tan bon cor,
		Del melhor qe anc non amet
	10	Nulhs amans pueis qe·l mon renhet,
		Vos envia .M. salutz lay
		E manda vos qe reman say (1),
		Aisi destreg per vostr' amor
		Qe, si no·l val e no·l secor
	15	L'umilitatz, per chauzimen ;
		Qe tant' es la dolor qe el sen
		E la pena greus per sofrir
		Mens preza vieure qe morir ;
		Car vieure es trop pietz de mort,
	20	Pus c'om non a joy ni deport.
		Dona, vos es aisela res
		Qe sobre can qe·l segle es
		Me plasetz e m'atalentatz,
		E yeu soi, Dona, so sapchatz,
	25	Sel hom el mon qe pus vos am
		E qe per autra no·m reclam ;
		Vostre soi per qe·us plassa far,
		E no·us poiria tot comtar
		Lo fin cor e la voluntat
	30	Qe m'avetz vos et amors dat
		Del dezir, com qe·us fos afans,
		Qe no m'aondaria .I. ans.
		Si non crezetz qe sia ver,
		Aujatz com o podetz saber :
	35	Bona Dona, sol non diatz...
		Mandatz me tot cant vos vulhatz,
		No·m recreirai de vos amar ;
		Qe res als no·m podetz mandar
		Q'ieu no segua vostre voler,
	40	Mas so don non ai ges poder.
		Per qe·m meravilh mot de vos,
		Bela Dona, cortez' e pros,
		Per qe reman, cant n'avetz aitz,
		Car mager amistat no·m faitz,
	45	Sie·us endeve per non amar
		O·us en fa temensa laissar ;
		Car segon so qe m'es parven,
		Si may m'aimassetz finamen,
		En pauc d'ora me pogratz tan
	50	Far d'amor et de bel semblan
		Don visqera tota sazos
		Alegres e bautz e joios.
		Bona Dona, per qe reman,
		Seran tostemps tug miey prec van.
	55	Dieus ! ta mal estet car anc fo
		En mon cor tan gentil faiso !
		Dona, per Dieu e per merce,
		Adossatz vostre cor vas me,
		Sostenetz me lo ters o·l cart
	60	Del dezir qe·m destruy e m'art !
		Dossa Dona, per q'ieu me clam,
		S'aisi finamen co ye·us am
		E·us tenc sobre tot cant es car,
		Vos pogues mon cor demostrar,
	65	Ab aitan me fora ben pres,
		Qe non cre ni m'albir ni·m pes,
		C'anc tan non amey luenh ni prop,
		Dona, n’en mon cor non l'atrop (2),
		Qe ieu nulha res tant ames
	70	Co yeu am vos, si m'ajut fes !
		Anc pus vos vi, ni nueg ni jor(n),
		No·us aic mas bon cor e melhor,
		Tant es fina ma voluntatz
		Vas vos, Dona, qe res no·m platz
	75	Si no·m pes c'a vos sia bo ;
		Ni ja Dieu senes vos no·m do
		— Q'ieu no vuelh —, Dona, joy ni be,
		Mas segon la vostra merce,
		On avetz pauzat et assis
	80	Mon cor, q'es mot lials et fis,
		Si qe mos majers pessamens,
		Bela Dona, doss' e valens,
		Es tot per far vostre plazer,
		Qe d'als non puesc cossir aver.
	85	Ieu no·us poiria ges comtar
		Ni per negu escrig mostrar
		Com ieu vos am veraiamen ;
		Car, so sapchatz certanamen,
		Non auria us escrivas,
	90	Ja no seria tan certas,
		Escrig lo ters ni la mitat
		De la dossa, fin' amistat
		Don mon cor es lassatz per vos.
		Q'ieu non cre qe nulhs homs c'anc fos
	95	Pogues sofrir los mals q'ieu tray
		Per vos, Dona, qe·m tenes lay
		Mon cor, qe no·s pot ges partir
		De vos, si·n sabia morir.
		E pus mon cor tenetz en gatje,
	100	Car no·us vey no·i aja dampnatje :
		Car sapchatz, sitot m'estau say,
		Lai on vos es mon cor estay.
		Vers es qe los cors son essems
		E ja no·s partiran nulh temps ;
	105	A calqe part lo vostres vir,
		Lo mieu no·s vol de vos partir.
		Dona, lo foc q'ieu ai d'amor,
		Qe·m fai blasmar a cascun jor,
		Me tol c'aras no·us puesc may dir,
	110	Per qe·m n'aven si a geqir.
		Dieus sal vos, en cuy es assis
		Mos joys, mos deportz e mos ris.
		Valha·m chauzimens e merces !
		Non puesc may dir : falh me l'ales.