Bec, Pierre. Les saluts d'amour du troubadour Arnaud de Mareuil. Toulouse: Édouard Privat, 1961.

Code: 030,IV Auteur: Arnaut de Maruelh Genre: Salut d'amor Numero: III

Tant m'abellis e·m plaz

	1	Tant m'abellis e·m plaz
		Jovens e amistaz,
		Cui per jasse m'autrei,
		Nul' autra re non vei
	5	Don aja soing ni cura,
		Q'aitals es ma ventura.
		Pero la manentia
		Q'eu ai de drudaria
		Es mos majer tesors,
	10	E fes e verais cors,
		E ma bona esperança,
		Don, si Dieus m'o enansa,
		Crei qe vencha al plus ;
		Ch'aisi o fai chascus
	15	Qi·s vol d'amor jauçir.
		Obs l'es sapcha sofrir (1)
		Las penas e·ls afans,
		Las iras e·ls bobans,
		L'orgoill e l'espaven
	20	Q'amors mostra soen ;
		E·ll vet e·ll escondig
		No sio e[n] mal es[c]rig.
		Ab gen sofrir en paz
		Esta l'orgoill damnaz,
	25	E ab bellas preguieras,
		En diversas manieras (2).
		Qi s'entremet d'amar
		E jen non sap preguar
		Enqer fa gran damaçe (3),
	30	Q'amors vol en coraçe
		Ardit cortes e franc,
		Sol qe non sia estanc.
		Nulha fola vanansa (4)
		Ke torne en balansa
	35	Amors maintas saços (5),
		A cui non es nuls pros ;
		Ans val mout mais assaz
		Jois on es mais celaz,
		Qe pos el es espars
	40	Non es tenguz en cars.
		Segon aqest saber
		Se devon captener (6)
		Cel q'amon finament,
		Seguon mon essient.
	45	Mais de me s'endeve,
		Qe mais am d'autra re,
		Q'aissi com eu am plus,
		Tem plus fort qe negus.
		Q'a penas aus cujar (7)
	50	En mon cor, ni pensar,
		Qe sel' amar mi deing :
		Per q'amors mi destreing.
		Ans n'ai lonc temps de sert
		Mon deçier(t) cubert,
	55	Q'anc no li·n fi semblant ;
		Mas des er en avant
		Conoisca be, se·l plai,
		Qe tant qant eu viurai,
		Serai vas leis aclis,
	60	C'ab un amoros ris
		Qe·m feç qan m'esgardet,
		M'ubri e·m trasforet
		Mon cor jusqa en mei loc.
		Adonc m'o tenc a joc (8),
	65	E paregro·m leugier
		D'amor li cossier ;
		Mas er son tan cregut
		Q'aissi m'an destolgut
		De nulh' autra facenda
	70	No·m plaz qe m'i entenda,
		Ni, se tot me volia
		Entendre, no·i poiria ;
		Q'ades tenc en corage
		Lo douç e·l bel estage
	75	Qe sela sab aver,
		Qe m'a en son poder,
		On es tota ma sortz (9),
		Ma vida e ma mortz.
		La vida i es, se·lh plaz,
	80	A far sas volentatz ;
		M'a retengut per ceu
		Q'eu·lh jur e·lh don a feu (10)
		Qe ja no pens ni fassa
		Mas so qe a leis plassa.
	85	Bella donna corteça,
		Ensenhada e apreça,
		La vostra grans beutaz,
		E·l deport e·l solaz,
		Don aveç entier laus,
	90	Mi fan tener enclaus
		Ins el cor un desir
		Don m'avenra morir,
		Se no·us en pren merces.
		A ! dousa franca res,
	95	Per vos art e aflam,
		Tan de bon cor vos am ;
		E se merces no·m val
		Ab vos, jamais non cal
		Qe m'esforce de viure ;
	100	Qe non poria escriure
		Uns clers a son viven
		Lo mal(s) q'eu per vos sen ;
		Ni non crei qe·l pogues
		Mais sufrir nulla res.
	105	Mas amors mi fai creire
		Qe jes no·m dei recreire
		D'amar vos a ma vida,
		Qe·us es tant eschernida
		E pros e conoichens,
	110	Pe[n]ra·us en chausimens
		De mi e pietaz.
		Pos aissi soi lassaz (11)
		E pres de vostr' amor,
		Domna, per grand dousor
	115	Vos voill merce clamar,
		Si no·m degnaz amar,
		Consentez me qe·us am.
		Per grand merce·us o clam,
		C'ab sol bella semblansa (12),
	120	Mi podez d'esperansa,
		De so q'eu plus deçir,
		Lonc temps suau noirir ;
		Qe mais am, fe qe·us dei,
		Domna, con que·m n'estei,
	125	De vos lo bon esper
		Qe d'autra tot aver.
		Qe, si Deus mi secora,
		Pueis vos vi, nulh[a] ora
		No·s poc de vos partir (13)
	130	Mos cors, don vos remir
		En pensan, car estiers
		No puesc, ke volentiers
		Vos vira de mos oils.
		Jes no m'o tolg orgoils,
	135	Mas failh me·n ochaiços (14),
		Domna, maintas saços,
		Qe non posc venir lai
		On vostre cors estai.
		Pero, Domna, on k'eu·m sia,
	140	Vos m'aves en bailia,
		Aisi ses part d'autrui ;
		No fez ren Dieus ab cui
		Vos m'ajaz a devire.
		No·us me pot contradire
	145	Negun' autr' amistaz ;
		Q'anc, Domna, ço sapchaz,
		Non fo neguns amans
		Qe tant be, ses engans,
		Ames com eu am vos :
	150	Neih Leander Eros (15),
		Ni Paris Elenan,
		Ni Pirramus Tisban (16),
		Ni Floris Blancaflor,
		Qe·n traich manta dolor,
	155	Ni Lavina Eneas,
		No neich Cleopatras
		Cel qe fo reis de Tyr.
		Non ac tan ferm desir,
		Ni crei qe tant ames
	160	Lo reis Etiocles (17)
		Salamandra tan be,
		Ni tan per bona fe,
		Ni anc Yseut Tristan,
		Qe·n sofri maint afan,
	165	Ni Berenguiers Quendis,
		Ni Valensa Seguis,
		Ni, pel meu essien (18),
		Absalon Florissen,
		Ni anc Itis, ço cre (19),
	170	No amet Biblis re,
		Avers so q'eu am vos
		Ni nuls amans q'anc fos
		No amet tant s'amia,
		Ni no crei ke mais sia
	175	Cors d'aman tant verais :
		K'eu, Domna, no m'irais.
		Tant dousamen mi seinch
		E tant gen mi destreinch
		Lo vostr' amor e·m lassa
	180	No sen mal qe no·m plassa.
		E donc, Domna, cum er
		D'est vostr' home qe·us quer
		Un(s) don que vos li deç ?
		No·us aus dir qe m'amez,
	185	Ni no·us aus dir aitan (20),
		Mas, se·us plaz, lo semblan (21),
		Dompna·m podez far be,
		E no·us greva de re ;
		E s'ab q'a pauc d'afan
	190	Podez tan fin aman
		Com eu so retener,
		Mout o devez voler.
		Dompna·m no·us posc plus dir,
		Qar tot lo mon consir,
	195	Mas ben podez mon mal
		E ma dolor coral
		Conoicher e saber.
		. . . . . . . . . . . . . . . . . . . . . . . .
		Per q'eu de toz mos bes
		Vos rent laus e merces,
	200	E·us o graçisc ades
		Q'al cor m'estaz plus pres.