Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Code: 335,007 Auteur: Peire Cardenal Genre: Canso Numero: III

Ar me puesc ieu lauzar d'Amor

I	1	Ar me puesc ieu lauzar d'Amor,
		Que no'm tòl manjar ni dormir ;
		Ni'n sent freidura ni calor
		Ni no'n badalh ni no'n sospir
	5	Ni'n vauc de nuech arratge,
		Ni'n soi conquistz ni'n soi cochatz,
		Ni'n soi dolenz ni'n soi iratz
		Ni non lògui messatges ;
		Ni'n soi trazitz ni enganatz,
	10	Que partitz me'n soi ab mos datz.
II		Autre plazer n'ai ieu major,
		Que no'n traïsc ni fauc traïr,
		Ni'm tem tracheiritz ni trachor
		Ni brau gilós que me n'azir ;
	15	Ni'n fauc fòl vassalatge,
		Ni'n soi feritz ni derocatz
		Ni no'n soi pres ni deraubatz ;
		Ni no'n fauc long badatge,
		Ni dic qu'ieu soi d'amor forçatz
	20	Ni dic que mos còrs m'es emblatz.
III		Ni dic qu'ieu mòr per la gensor
		Ni dic que'l bèla'm fai languir,
		Ni non la prèc ni non l'azor
		Ni la deman ni la desir.
	25	Ni no'l fatz omenatge
		Ni no'l m'autrei ni'l me soi datz ;
		Ni non soi sieus endomenjatz
		Ni a mon còr en gatge,
		Ni soi sos pres ni sos lïatz
	30	Anz dic qu'ieu li soi escapatz.
IV		Mais deu òm lauzar vencedor
		Non fai vencut, qui'l ver vòl dir,
		Car lo vencens pòrta la flor
		E'l vencut vai òm sebelir ;
	35	E qui venc son coratge
		De las desleials voluntatz
		Dont ieis lo faitz desmesuratz
		E li autre outratge,
		D'aquel véncer es plus onratz
	40	Que si vencia cent ciutatz.
V		Pauc prètz prim prèc de pregador,
		Quan cre qu'ilh, cui quèr convertir,
		Vir vas vil voler sa valor,
		Dont dreitz deu dar dan al partir ;
	45	Si sèc son sen salvatge,
		Lèu l'èr lo larcs laus lag lonhatz.
		Plus prètz lauzables que lauzatz :
		Tròp ten estrech ostatge
		Dreitz drutz del dart d'amor nafratz ;
	50	Pus pauc prètz, pus prètz es compratz.
VI		Non vòlh voler volatge
		Que'm vòlv e'm vir mas voluntatz
		Mas lai ont mos vòls es volatz.