Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Code: 394,001 Auteur: Raimon d'Avigno Genre: Sirventes Numero: XIV

Sirvens sui avutz et arlòtz

I	1	Sirvens sui avutz et arlòtz,
		E comtarai totz mos mestiers,
		E sui estatz arbalestiers
		E portacarn e galïòtz
	5	E rofians e baratiers
		E pescaires et escudiers,
		E sai ben de pèira murar,
		Però de cosir non tròp par,
		E mauta mortèi mantas ves,
	10	Et ai mais de cent auzèls pres ;
		E sui trobaires bèls e bons,
		Qu'eu fatz sirventés e tençons,
		E sui joglars desavinens
		E de sèt ordes sui crezens.
II	15	E fui mazeliers e fis datz,
		E corregiers fui lonjamens,
		E sai far anèls bèls e gens
		E rateiras per penre ratz,
		E far ausbèrcs e garnizons,
	20	E sai far putas e lairons,
		E sangnèi braç, e fui boviers
		E mais d'un mes mercadaniers,
		E sai far arcas e vaissèls,
		Penches e fus e cascavèls,
	25	E sai far galeas e naus,
		Coutèls et espazas e faus ;
		E sai èsser pèstres e còcs,
		E sui bons mètges quant es lòcs.
III		E fui clèrgues e cavaliers
	30	Et escrivans e taverniers,
		E sai far sèlas et escutz,
		E sai ben pénher e far glutz,
		E sai tèisser e far carbon,
		E sai faire del gal capon,
	35	E sai far teulas e capèls,
		E sai far gipas e gipèls,
		E sai far lanças e bordons,
		E sui especïals tròp bons,
		E sai batre lan' e deniers,
	40	E sui fòrt cortés agulhiers,
		E sui cambïaires leials,
		E sui envèrs las femnas fals.
IV		E fis estueira e tamís,
		E cerquèi aur e pueis m'assís
	45	A cavar argen ben tres ans,
		E fui corrieus arditz e grans,
		E sai far frens et esperons,
		E budeliers fui a sazons,
		E fis caus e fui campaniers,
	50	E sai ben èsser falconiers,
		E fui portiers e barufautz
		E gacha per fregz e per cautz,
		E bilhaires e berretiers,
		E fui de seda bons obriers,
	55	Et engenhs fis, si Dieus mi gar,
		E còrdas e pairòls sai far.
V		Ancar n'ai agutz de melhors,
		Qu'eu gardèi fedas et anhèls,
		E fui crestaires de porcèls,
	60	E teis fil de maintas colors,
		E toquèi ases e saumiers,
		E fui mais de dos ans porquiers,
		E fui penchenaire de lin,
		E gardèi mais d'un an molin,
	65	E fui manescals de cavals
		E gardèi eguas per las vals,
		E fui fabres e peleciers,
		Si m'ajut Dieus, e sabatiers ;
		Qui me'n vòl creire, bons fòls sui,
	70	E savis ben, quan tròp ab cui.
VI		E fis olas e fui sauniers,
		E fui caçaires e veiriers,
		E fis pargamins e fossatz,
		E sai lïar radèls e ratz.
VII	75	E talhèi borsas e vendèi
		Plom per argent, e pois menèi
		Orps e devinc redons e gras,
		E fui barbiers, e paniers fas.