Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Code: 029,015 Auteur: Arnaut Daniel Genre: Sirventes Numero: XXX

Pòis Raimons e'N Trucs Malècs

I	1	Pòis Raimons e'N Trucs Malècs
		Chapten N'aiman e sos dècs,
		Enans serai vielhs e canècs
		Ans que m'acòrt en aitals prècs
	5	Don puòsca venir tan grans pècs ;
		Qu'al cornar l'agra mestiers bècs
		Ab que'lh traissés del còrn los grècs ;
		E pòis pògra ben issir cècs
		Que'l fums es fòrtz qu'ieis dins dels plecs.
II	10	Ben l'agra òps que fos becutz
		E'l bècs fos loncs et agutz
		Que'l còrns es fèrs, laitz e pelutz
		E nul jorn non estai essutz,
		Et es prion dins la palutz
	15	Per que relent' ensús lo glutz
		Qu'adès per si cor ne rendutz ;
		E non vòlh que mais sia drutz,
		Cel que sa boch' al còrn condutz.
III		Pro i agra d'autres assais,
	20	De plus bèls que valgron mais,
		E si En Bernartz se n'estrai,
		Per Crist, anc-no'i fetz que savais,
		Car l'en pres paors et esglais.
		Car si'l vengués d'amont lo rais
	25	Tot l'escaldèra'l còl e'l cais ;
		E no'is coven que dòmna bais
		Aquel qui cornès còr putnais.
IV		Bernartz, ges eu non m'acòrt
		Al dich Raimon de Durfort
	30	Que vos anc mais n'aguessetz tòrt ;
		Que si cornavatz per depòrt,
		Ben trobavatz fòrt contrafòrt,
		E la pudors agra'us tòst mòrt,
		Que peitz òlh non fa fems en òrt ;
	35	E vos, qui que'us en desconòrt,
		Lauzatz en Deu que'us n'a estòrt.
V		Ben es estòrt de perilh
		Que retrach for' a son filh
		E a totz aicels de Cornilh ;
	40	Mielhs li fora fos en issilh
		Que la cornès en l'enfonilh
		Entre l’eschin' e'l penchenilh
		Lai on se sagna de rovilh ;
		Ja non saubrà tant de gandilh
	45	No'lh compissès lo gronh e'l cilh.
VI		Dòmna, ges Bernartz non s'estrilh
		Del còrn cornar ses gran dozilh
		Ab que seire'l trauc del penilh,
		Puois poirà cornar ses perilh.