Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Code: 012,001=108,001 Auteur: Alaisina Yselda , Carenza Genre: Tenson brève Numero: XLIV

Na Carenza al bèl còrs avenens

I	1	Na Carenza al bèl còrs avenens,
		Donatz conselh a nos doas serors,
		E car saubetz mielhz triar lo melhors
		Consilhatz mi segon vòstr' escïens :
	5	Penre marit a vòstra conoissença
		O 'starai mi pulcela ? E si m'agença,
		Que far filhons non cuit que sia bos
		E sens marit mi par tròp angoissós.
II		N'Alaisina Iselda, 'nsenhamens,
	10	Prètz e beltatz, jovenz, frescas colors,
		Conosc qu'avètz, cortisia e valors
		Sobre totas las autras conoissens ;
		Per qu'ieu conselh per far bona semença
		Penre marit coronat de scïença,
	15	En cui faretz fruit de filh glorïós :
		Retenguda 's pulcel' a cui l'espós.
III		Na Carenza, penre marit m'agença,
		Mas far infanz cuit qu'es gran penitença,
		Que las tetinas pendon aval jos
	20	E lo ventrilh es ruat e 'nojós.
IV		N'Alaisina Iselda, sovinença
		Ajatz de mi e' us membre de guirença ;
		Quant i seretz prejatz lo Glorïos
		Qu'al departir mi ritenga près vos.