Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Code: 558,024 Auteur: Raimon Cornet Genre: Canso replicada Numero: XLIX

Jòis e dolors al mieu còr afan fan

I	1	Jòis e dolors al mieu còr afan     fan,
		Per vos, Midòns, que'm faitz d'un cordó     do,
		Neis o de mens, e'l dizir valo     lo,
		Don tròp sosmés l'albir, vos aman,     m’an
	5	Si me volètz ses òps escapar,      par
		Que maldizent vòlon del camí     mi
		Traire d'onor, car ieu vuelh amar     mar
		De bons costums, que mot no'i pessi     si.
II		Na flors, al cl[èrc], vòstre peregrí     gri
	10	Monge daretz, si dreitz no'us remòrt,     mòrt
		Car no'lh donatz el vòstre ressòrt     sòrt
		Que puesca far d'enamorat fi     fi.
		Per mi'us dic, que tròbi restant     tart,
		Si be'm soi mout, Dòmna, reclamatz     matz
	15	Del jòc d'amor, que'ls amans ses art     art ;
		Mas trop m'èr grèu, si vos escalfatz     fatz.
III		Dar no'us vuelh ja, si non m'arrapatz,      patz,
		Fons de valor, car totz plaitz covens     vens,
		Ni d'amar vos non serà cossens     sens,
	20	Ni'us rendrà pro, si no us alegratz,      gratz
		Per qu'ieu vos prèc, Dòmna, que'm donetz     netz
		Joièls d'amor que'm fasson cobe      be
		D'amor tostemps car a nos foletz      letz,
		Que fam chançons don bens a jove      ve.
IV	25	Ira que'us mòu, Dòmna, ses comte      te
		Mi senes fruch, que portar dègra      gra
		D'amor fizèl, e part d'escrivà      va
		Que ges no'us ditz qu'ab son vòl erre      re ;
		Per qu'ieu torbatz, que'm senti mendic,      dic
	30	Que'l vòstr' albirs m'es tròp enojós      jos,
		E s'ieu no'l vis de tan fòrt garric,      ric
		Me feiran l'uelh que'm tenetz gravós      vos.
V		A vos me clam del que ten renós      nos,
		Qu'ieu'n so de cants e de tot sólaç      las.
	35	E ses molhar ab un gros ferràs      ras,
		Per que n'an flacs, Dòmna, mas chançós      sos ;
		E si no'm datz lo jòi que promés      m'es
		D'amor leial, l'alre, que de çai      sai,
		No'm pòt valer, çò'm cug, un pogés      ges,
	40	Don mos captenhs cum d'òme savai      vai.
VI		Ròsa d'abril, quar ètz de gran pes      pes
		Qu'ieu chant per vos e vuelh far val mai      mai,
		Car de Caumont ètz d'onor temples      ples,
		On de salut — un ses plus — querrai      rai.