Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Code: 236,004 Auteur: Guilhem de la Tor Genre: Canso Numero: II

Ges cil qe·s blasmon d'amor

I	1	Ges cil qe·s blasmon d'amor,
		quant no n'an tot lor voler,
		no fan sen, al mieu parer:
		c'aissi con li bon seingnor
	5	esprovon lor servidors
		e pois lor donan honors,
		segon lor valensa,
		esprova amors ses faillensa
		los sieus e sap lor merir,
	10	segon qu'il sabon servir.
II		Per que li bon servidor
		devon ades ferm tener
		en amor lor bon esper:
		qu'en ioi torna et en dousor
	15	lo mals e·l dans e l'errors
		c'amors don'als amadors,
		quant lor fai garensa,
		si cum fai grans malvolensa
		grans bes-faitz desovenir,
	20	per q'om no s'en deu partir.
III		Pero li fals tradidor
		fan lonc temps los fins doler:
		qu'aissi com cil q'an saber
		se gardon et an paor
	25	dels lairos e dels traichors,
		an dels fals galiadors
		las dompnas temensa,
		per qe fan longa atendensa
		far als fins ab maint sospir
	30	et ab maint cozen consir.
IV		E pois lor donan ricor
		tant grant que non pot saber
		lo ioi, qu·il an ni·l plazer
		nuills hom, si non es de lor:
	35	q'om non sap las grans sabors
		dels bes ni de las dolors
		la greu penedensa
		qui non sap, a ma parvensa;
		ez eu, so ai per sentir,
	40	sai com fai mais greu soffrir.
V		E, merce de la gensor,
		sai cum bes es bos d'aver:
		c'ab baisar et ab iaser
		m'a trait d'ira e de tristor:
	45	e, car m'a de mon mal sors,
		no·m voill mais virar aillors:
		que sa chaptenensa
		e sos bels cors gais m'agensa
		tant c'ades plus la desir,
	50	on plus sovent la remir.
VI		Greu er cel dels amadors,
		segont ma parvensa,
		cui fassa iois mantenensa,
		qui non sap d'amor soffrir
	55	los mals traig[s] e·ls bes grazir.