Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Code: 236,009 Auteur: Guilhem de la Tor Genre: Canso Numero: IV

Si mos fis cors fos de fer

I	1	Si mos fis cors fos de fer,
		si·s degra a l'afan fer
		esser partitz, qu'el sufer:
		qu'amors lo bat tant e·l fer
	5	qu'inz l'infer
		li fora mielz, com retrai,
		qu'el fos qu'en l'afan qu'el trai:
		qe m'atrai,
		domna, per vos desconort,
	10	cui am, dont non ai conort.
II		Per so, si·m dei conortar,
		qu'eu sai qu'en desconortar
		non pot hom ren conquistar:
		per qu'om deu ben sofertar
	15	e portar
		en patz tot son desplazer,
		entro qe vegn' al plazer:
		que vezer
		non deu hom far sa dolor
	20	en loc on no·il a valor.
III		Car cel se fai honramen,
		qui semblan de iauzimen
		fai e ten cubertamen
		en son cor son marrimen:
	25	qu'aissamen
		com li pot mals avenir,
		li poiria bes venir,
		que fenir
		poiria totz los mals traitz
	30	qu'el a per totz temps mal traitz.
IV		Per qu'eu, suffren esperan,
		aten e si vau garan,
		s'amors e merces trairan
		ver mi·l ioi, don desiran
	35	mi faran
		languir, si no·m ven confortz
		per lor; mos grans desconfortz
		er trop fortz,
		s'ab vos no·m val pietatz,
	40	domna, on es fina beutatz.
V		Con plus me di « vira te »,
		Mos-Cors, vostr'amors, que·m te,
		adoncs plus fort mi rete.
		Ha, dompna, cui iois mante
	45	e chapte,
		non gardaz vostra rictat,
		mas gardatz humilitat
		e bontat:
		que ricors crei que desval
	50	ses merce plus que non val.
VI		Caps de pretz, flors de beutat,
		aiaz de mi pietat!
		Q'en veritat
		vos dic que vita·m desval,
	55	si merces ab vos no·m val.