Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Code: 236,007 Auteur: Guilhem de la Tor Genre: Canso Numero: V

Qui sap, sofrent, esperar

I	1	Qui sap, sofrent, esperar
		son bon seignor, molt greu es
		c'un tems no·ill en veigna bes,
		s'el li sap sirven mostrar
	5	son affar,
		car servirs tot ben atrai:
		per qu'eu mon leial cor ai
		et aurai
		toz tems en amor servir,
	10	e ia no m'en voill partir.
II		E s'ieu tot m'o volgues far,
		eu no m'en poiria ges
		partir, enaissi m'a pres
		ses ioi qe no·m vol donar;
	15	mas clamar
		no m'en dei ni non farai.
		Que farai donc? Atendrai
		e veirai
		s'amors me volra garir
	20	del mal dont sovent sospir.
III		E pois d'aitan conortar
		mon cor que greu er cortes
		tenguz cel ni ben apres
		cui amors non fai amar;
	25	per qe·m par
		q'es fols cel qui s'en estrai:
		q'eissamen sap donar iai
		cum esmai
		amors ; mas mi fai languir,
	30	car sap q'eu la sai blandir.
IV		Car, vos, on son mei pessar,
		domna, ses cui no·m plaz res,
		m'avez en tal prison mes
		qe·m fai soven sospirar,
	35	per o qar
		mi son douz li mal que·m fai
		per vos amors e·ill esglai:
		car eu sai
		q'aissi con hom vol iauzir
	40	los bes, deu los mals sofrir.
V		Per q'eu no·m voill ia loignar
		de vos, dompna, car conqes
		avez tot cho q'om pogues
		de ben dire ni pessar:
	45	gen parlar,
		cortesia, pretz verai,
		don lauzors fina·s retrai,
		solaz gai,
		gen rire, gent acoillir,
	50	beutat, la gençer qe·s mir.
VI		E, pos tuit li ben estar
		son en vos, ben es ma fes
		qe·i degues esser merces,
		que·m fezes mon mal amar
	55	adouzar;
		qe, ia tant quant eu viurai,
		mon cor de vos non partrai:
		qe de lai,
		dont hom se cuida enrequir,
	60	part hom molt greu son desir.
VII		Per q'eu, dompna, enrequirai
		per vos, o per vos morrai;
		car ben sai
		que d'als no·m puosc enriquir:
	65	gardaz cum m'en dei partir!