Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Code: 236,002 Auteur: Guilhem de la Tor Genre: Canso Numero: VIII

Canson ab gais motz plazens

I	1	Canson ab gais motz plazens
		avinens
		entendens
		vol qu'eu retraia mos sens
	5	en que·m plaingn' als fins amans
		dels affans
		e dels dans,
		que·m don' amors, trop pesans:
		don mi fai aissi languir
	10	e delir
		que garir
		no·m vol ni laissar morir.
		Doncs, s'ieu m'en part, aissi fatz
		com senatz,
	15	mas, sapchatz,
		non si com enamoratz.
II		E, doncs, qual conseill penrai?
		que farai?
		amarai ?
	20	O eu; car conosc e sai
		c'om non a tan gran lausor
		de seingnor,
		c'a valor,
		si·l serv que n'aia ricor,
	25	coma sel qu'a bona fe
		l'am' e·l cre
		e·l serv be,
		ades quan tot pro no·ill te.
		Doncs, non es, a dir vertat,
	30	tant lauzat
		a l'amat
		d'amar com al desamat.
III		Car ges sel qu'es car tengutz
		e volgutz
	35	e cregutz
		per sa domn' e erebutz
		non a d'amar pretz tan gran,
		fe que·us man,
		dreg mostran,
	40	com sel q'en languis aman,
		e sofre d'amor los fais
		e·ls esglais
		si qu'esmais
		non a poder l'en biais:
	45	per qe, si be·m don'amors
		greus dolors
		ses socors,
		al menz, s'ieu am, m'es honors.
IV		E car conosc c'onors m'es,
	50	non es res
		que·m pogues
		mon cor partir d'amor ges;
		e s'amors per son orgoill
		no m'acuoill,
	55	don me duoill,
		sabez per que no m'en tuoill?
		Qu'eu ai vist home valen,
		mal trazen
		e sofren,
	60	venir en gran honramen:
		per c'amors, si tot no·m val,
		no·m fai mal
		tan coral
		c'umil no m'ag' e lial.
V	65	Si que totz a lei m'autrei
		e·il soplei
		e·il mercei
		e no fas semblan que·m grei,
		com plus mi destreing e·m fier,
	70	a sobrier,
		ans soffier;
		perso, si·l platz, merce·ill quier
		que de lleis mi fass' aver
		mon voler,
	75	don mover
		non posc lo cor ni·l saber;
		ans d'amar leis m'asegur
		e m'atur
		e·m meillur;
	80	mas trop a·l cor vas mi dur!
VI		Car fis iois, que ia·m fon guitz
		e cobitz
		et aizitz,
		es per mi de lleis partitz
	85	si que ia·m fai sospirar
		e plorar
		e pensar
		on eu plus la posc amar.
		Mas c'ella del foc que m'art,
	90	don no·m part,
		agues part
		la mitat o·l ters o·l quart,
		eu no·n son tan de ioi blos
		qu'eu non fos,
	95	a sasos,
		en breu temps rics e ioios.
VII		Sos gens cors gais, amoros,
		volgra·m fos
		aitan bos
	100	qu'en breu en fos sai ioios.
VIII		Na Joana·l rics ressos
		e·l pretz bos,
		qu'es de vos,
		fai lo nom d'Est cabalos.