Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Code: 236,008=250,001 Auteur: Guilhem de la Tor , Imbert Genre: Tenso (Partimen) Numero: XII

Seigner n'Imbert, digatz vostr'escienssa

I	1	[Seigner n'Imbert, digatz vostr'escienssa
		de las razos q'ie·us enqier e·us deman:
		s'una dompna amatz de fin talan
		e·i avetz mes lo cor e l'entendenssa
	5	qe·us don s'amor et ill fai s'en preiar
		tant tro conois que non i pot pechar,
		ed un'autra, q'es ben atretan pros,
		ses tot preiar s'abellis tan de vos
		qe·us autreia e·us dona s'amistat,
	10	a cal d'ambas en sabretz mais de grat?]
II		Guillem, ben sai, segon ma conoissenssa,
		d'estas razos, qe·m partetz en chantan,
		triar lo mieils, segon lo mieu semblan,
		e dirai vos cal vuoill plus ni m'agenssa:
	15	q'ieu pretz trop mais de dompna e m'es plus car
		qand ses mos precs me vol d'aitan honrar
		qe·m don s'amor leialmen a rescos,
		que d'un'autra q'ieu prec un an o dos
		e·i entenda longamen a celat.
	20	De l'autra·us dic que m'a trop mieils honrat.
III		[Seigner n'Imbert, ben deu aver temenssa
		bona dompna e taing que an doptan
		c'a tal non don s'amor qe·is n'an vanan
		ni·n leu fol bruich en faich ni en parvenssa.
	25	E fins amans no·is deu desconortar
		si tot sidonz no·il vol al comenssar
		donar s'amor, mas s'el es larcs e pros
		serva sidonz tro veigna·l guizerdos,
		car paors es de leu ioi conquistat
	30	c'autre l'agues per aquel eis mercat.]
IV		Guillem, mais val iois qand en ben comenssa
		e mou de grat q'aicel qe fai son dan,
		que tal n'i a vai son amic loignan
		tro tota gens conois lor benvolenssa.
	35	E pros dompna, pois a bon cor d'amar,
		non deu ges trop son amic far preiar,
		c'ad amdos es iois e meillurazos
		on enans son ensems ab ioi ioios;
		e vos avetz ben talan de foudat
	40	c'anc non vim ioi sobreleu conquistat.