Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Code: 461,204 Auteur: Anonyme Genre: Canso Numero: I

Quan Proensa ac perduda proeza

I		Quan Proensa ac perduda proeza
		e pretz e ioy e valor e totz bes,
		tengron tot dreg tug marrit, de que·m peza,
		lai on estan ab gaug als Genoes;
	5	e quar ylh no sabian la via,
		agron la Flor de cortezia
		que·ls capdelhet tro lai per son plazer,
		que de Rogier a sobrenom per ver.
II		E quar li pron de Geno'an largueza,
	10	ar reten omna Guillelma, so·m pes,
		quar elha es sobr'autras plus corteza,
		que sap d'amor e de ioy tot quan n'es,
		qu'ilh a beutat ses maestria
		e solatz ab plazent cuynhdia,
	15	per qu'hom lo·y deu a gran valor tener,
		si·l Genoes la sabon retener.
III		Si Dieus m'agues donat tan de riqueza
		qu'ie·us conogues enans que sai vengues,
		ia no·m fer' hom en Proensa greveza
	20	que a sofrir tot leu no·m paregues,
		ab q'ieu agues vostra paria;
		mas quan vinc sai, yeu no sabia
		que tan de be tras mi lai remazes,
		que no cujetz qu'ieu partir m'en volgues.
IV	25	E no m'en part, an suy ab vos empreza
		per la valor que de vos ai apres;
		mas l'enveya que s'es en mon cor meza
		de vos vezer, no sai quo s'en pogues
		issir iamais, s'ieu no·us vezia;
	30	ans sai que deziran murria,
		que ses vista dels huelhs non pot aver
		cor deziros adrechamen plazer.
V		Si tot no·us vey si cum volria,
		l'uelh del cor vos vezon tot dia,
	35	qu'anc pueys no·us puesc gitar a non-chaler,
		pus auzi dir co·us sabetz captener.
VI		Belha de Rogier, s'ieu podia,
		vostre gen cors plazen veyria;
		qar a totz selhs que vos van lai vezer
	40	faitz pretz de vos e gran lauzor tener.