Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Code: 236,005a Auteur: Guilhem de la Tor Genre: Sirventes Numero: XIV

Pos n'Aimerics a fait far mesclança e batailla

I	1	Pos n'Aimerics a fait far mesclança e batailla
		de na Salvaga, on prez es e valors senz failla,
		e de na Biatrisz, sa seror, que·s trabailla
		de tot ço mantener c'a fina valor vailla,
	5	eu vueill far venir tals que partan lor barailla
		a treva, que non voill de tot la definailla.
II		Na Biatriz i ven d'Est, cui fins prez capdella,
		e Marqueset' apres, on valors renovella;
		e de Ravena i ven n'Esmilla, cui apella
	10	fis prez, e de Magon na Biatriz la bella
		e n'Alazaiz, sa sor, qui sap ja la novella;
		e de Bresaina i ven ma dompna na Donella.
III		E de Soraigna i ven na Sandra la cortesa
		e na Berta, en cui es beutaz e valors mesa;
	15	na Mabilia i ven, qu'es de totz bes apresa;
		pueis i ven n'Agnes d'Arc, on nuilz mals non adesa;
		e de Casalot ven na Sufia, c'an presa
		jois e prez e valors a lor part e conquesa.
IV		E de Ponçon i ven n'Esmilla la prezada;
	20	de Cantacabra i ven la bella e l'ensegnada
		na Caracosa, qu'es per los valens amada,
		e de Sarzan i ven n'Aiglina la lauzada;
		e cellas de Plozacs, cui jois e prez agrada
		venon a esperon a la treva nomnada.
V	25	De Luna eissamen i venon senz faillida
		las dompnas, cui jovenz ni valors non oblida,
		e de Casellas pueis venon ses far gandida
		las dompnas, c'an fin prez ab proesa conplida,
		e de Romaigna i ven la dompna, cui jois guida,
	30	e de Castel i ven na Bruna la grazida.
VI		E del Carret i ven na Comtessons, qui zenza
		chascuns jorns en fin prez ez en fina valenza,
		e de Coissan i ven na Verz, c'a s'entendenza
		en mantener honor e fina conoissenza.
	35	Aquestas, qu'eu ai dit, totas ses retenenza
		venon las tervas far, qu'enaissi lor agenza.
VII		Aras vos dic que son vengudas ses doptanza
		las dompnas, e si fan enaisi l'acordanza,
		qu'en las doas serors non aian mais erranza,
	40	e que la terva dur ses far nulla mesclanza,
		e s'om de l'una di neguna ren d'onranza,
		que l'autra s'i acort e que n'ai' alegranza.
VIII		Ez enaissi sera la lor trev' alegranza,
		e plaira ben als pros lo plaiz e l'acordanza.